ധർമ്മജൻ ബോൾഗാട്ടിക്കെതിരെ സാമ്പത്തിക വഞ്ചനാകേസ്

കൊച്ചി: നടൻ ധർമ്മജൻ ബോൾഗാട്ടിക്കെതിരെ കേസ്. ധർമ്മജന്റെ ഉടമസ്ഥതയിലുള്ള ധർമ്മൂസ് ഫിഷ് ഹബ്ബിന്റെ പേരിൽ സാമ്പത്തികമായി വഞ്ചിച്ചെന്നാണ് പരാതി. ധർമ്മജൻ ഉൾപ്പെടെ 11 പേർക്കെതിരെ കൊച്ചി സെൻട്രൽ പൊലീസ് എഫ്ഐആർ രജിസ്റ്റർ ചെയ്തു. പലപ്പോഴായി ധർമ്മജനുൾപ്പെടെയുള്ള പ്രതികൾ 43 ലക്ഷം രൂപ വാങ്ങി മീൻ എത്തിച്ചു കൊടുത്തില്ലെന്ന്  പരാതിയിൽ പറയുന്നു.

          ധർമ്മൂസ് ഫിഷ് ഹബ്ബിന്റെ കോതമംഗലത്തെ ഫ്രാഞ്ചൈസി നൽകാമെന്ന് പറഞ്ഞ് തന്റെ കൈയ്യിൽ നിന്നും പണം വാങ്ങി വഞ്ചിച്ചെന്ന് പരാതിയിൽ പറയുന്നു. മൂവാറ്റുപുഴ സ്വദേശി ആസിഫ് അലിയാർ ആണ് പരാതിക്കാരൻ. 2019 നവംബർ 16 ന്  തുടങ്ങിയ ഫ്രാഞ്ചൈസി മാർച്ച് മാസത്തോടെ മത്സ്യ വിതരണം നിർത്തി. പിന്നീട് പണം തിരികെ തന്നില്ല. വിശ്വാസ വഞ്ചന കാണിച്ചു തുടങ്ങിയ ആരോപണങ്ങൾ ഉന്നയിച്ച് പരാതിക്കാരൻ കോടതിയെ സമീപിച്ചതിനെ തുടർന്ന് കോടതി നിർദേശ പ്രകാരമാണ് കേസെടുത്തത്. എറണാകുളം പോലീസ് സ്റ്റേഷനിൽ ഹാജരാകാനാണ് നോട്ടീസ്.