ഒന്നര നൂറ്റാണ്ടിന്റെ ഓർമ്മ; വടകര സബ് രജിസ്ട്രാർ ഓഫീസ് ഇനി വിസ്മൃതിയുടെ ആഴങ്ങളിലേക്ക്

വടകര: ഒന്നര നൂറ്റാണ്ട് മുമ്പ് നിലവിൽ വന്ന, ഒരുപാട് ചരിത്രമുറങ്ങുന്ന വടകര സബ് രജിസ്ട്രാർ ഓഫീസ് ഓർമ്മയുടെ ആഴങ്ങളിലേക്ക് മറയും. നിലവിലുള്ള ഓഫീസ് പുതിയ കെട്ടിടത്തിലേക്ക് മാറ്റുന്നതോടെ കെട്ടിടം വിസ്മൃതിയിലാഴും. റവന്യൂ ടവർ നിർമാണത്തിന്റെ ഭാഗമായി എടോടിയിലെ വാടക കെട്ടിടത്തിലേക്കാണ് ഓഫീസ് മാറ്റിയത്. റവന്യൂ ടവർ പൂർത്തിയാകുന്നതോടെ ഓഫീസ് പുതിയ കെട്ടിടത്തിൽ പ്രവർത്തിച്ചു തുടങ്ങും.

       1865 മാർച്ചിലാണ് വടകരയിൽ സബ് രജിസ്ട്രാർ ഓഫീസ് പ്രവർത്തനം തുടങ്ങിയത്. മലബാറിൽ അഞ്ചരക്കണ്ടിയിൽ മാത്രമാണ് അക്കാലത്ത് സബ് രജിസ്റ്റാർ ഓഫീസ് ഉണ്ടായിരുന്നത്. 1969 വരെ ആധാരത്തിന്റെ പകർപ്പുകൾ ജീവനക്കാർ തന്നെ എഴുതി സൂക്ഷിക്കലായിരുന്നു. പിന്നീട് ഫയലിംഗ് സമ്പ്രദായത്തിലേക്ക് മാറി. 

       ഇത്തരത്തിലുള്ള 3000ത്തിലധികം വാല്യങ്ങളും, അതിലേറെ സൂചക പത്രങ്ങളും ഓഫീസിൽ കേടുകൂടാതെ സൂക്ഷിച്ചിട്ടുണ്ട്. 1988 മുതലുള്ള രജിസ്ട്രേഷൻ രേഖകളും കമ്പ്യൂട്ടറിൽ ഉണ്ട്.