പന്തളത്ത് പോലീസുകാർക്ക് നേരെ ആക്രമണം; രണ്ടു പോലീസുകാർക്ക് പരിക്ക്
സംഭവത്തിൽ രണ്ടു പേരെ പോലീസ് അറസ്റ്റ് ചെയ്തു
പത്തനംതിട്ട: പന്തളത്ത് പോലീസുകാർക്ക് നേരെ ആക്രമണം. അക്രമണത്തിൽ രണ്ട് പോലീസുകാർക്ക് പരിക്ക്. പന്തളം എസ്ഐ ഗോപൻ, സിവിൽ പോലീസ് ഓഫീസർ ബിജു എന്നിവരെ പരിക്കുകളോടെ ആശുപത്രിയിൽ പ്രവേശിപ്പിച്ചു. സംഭവത്തിൽ രണ്ടുപേരെ പോലീസ് അറസ്റ്റ് ചെയ്തു.
പന്തളം മാന്തുകയിൽ ഇന്ന് ഉച്ചയ്ക്ക് ഒരു മണിയോടെയാണ് സംഭവം. പ്രദേശവാസിയായ അജി എന്ന വ്യക്തി നൽകിയ പരാതി സംബന്ധിച്ച അന്വേഷണത്തിനെത്തിയപ്പോഴാണ് ആക്രമണമുണ്ടായത്. പ്രദേശവാസികളായ രണ്ടുപേർ തമ്മിൽ ദീർഘകാലമായി നിലനിൽക്കുന്ന പ്രശ്നങ്ങളെ തുടർന്നുള്ള പരാതി അന്വേഷിക്കാനാണ് പോലീസ് സംഘം സ്ഥലത്ത് എത്തിയത്.
പ്രാഥമിക അന്വേഷണം പൂർത്തിയാക്കിയ ശേഷം പരാതിക്കാരനേയും ആരോപണ വിധേയനേയും സ്റ്റേഷനിലേക്ക് കൂട്ടിക്കൊണ്ടുപോകാൻ ശ്രമിക്കുന്നതിനിടെ അജിയുടെ എതിർകക്ഷിയായ മനു, ഇയാളുടെ ബന്ധു അഞ്ചൽ സ്വദേശി രാഹുൽ എന്നിവർ പോലീസിനെ തടയുകയായിരുന്നു. ഇതിനിടെയുണ്ടായ പിടിവലിക്കിടെയാണ് പോലീസുകാർക്ക് പരിക്കുണ്ടായത്. എസ്ഐ ഗോപന്റെ കാലിനും ബിജുവിന്റെ കൈയ്ക്കുമാണ് പരിക്കേറ്റു. ഇരുവരേയും പന്തളത്തെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. പരിക്ക് ഗുരുതരമല്ലെന്നാണ് പ്രാഥമിക വിവരം.
സംഭവവുമായി ബന്ധപ്പെട്ട് പരാതിക്കാരൻ അജി, എതിർകക്ഷികളായ മനു, രാഹുൽ എന്നിവരെ സംഭവസ്ഥലത്തുനിന്ന് പോലീസ് സംഘം സ്റ്റേഷനിലെത്തിച്ചിട്ടുണ്ട്. ഇതിൽ മനു, രാഹുൽ എന്നിവരുടെ അറസ്റ്റും രേഖപ്പെടുത്തി.

