പന്തളത്ത് എം.ഡി.എം.എയുമായി യുവതിയുള്‍പ്പെടെ അഞ്ചുപേർ പിടിയിൽ

പന്തളം: എം.ഡി.എം.എയുമായി ഒരു യുവതിയുള്‍പ്പെടെ അഞ്ചുപേരെ പന്തളം പോലീസ് അറസ്റ്റുചെയ്തു. അടൂര്‍ പറക്കോട് ഗോകുലം വീട്ടില്‍ ആര്‍.രാഹുല്‍ (29), കൊല്ലം കുന്നിക്കോട് അസ്മിന മന്‍സിലില്‍ ഷാഹിന (23), അടൂര്‍ പള്ളിക്കല്‍ പെരിങ്ങനാട് ജലജവിലാസം വീട്ടില്‍ പി.ആര്യന്‍(21), പന്തളം കുടശ്ശനാട് പ്രസന്നഭവനത്തില്‍ വിധു കൃഷ്ണന്‍(20), കൊടുമണ്‍ കൊച്ചുതുണ്ടില്‍ സജിന്‍(20) എന്നിവരാണ് അറസ്റ്റിലായത്. ജില്ലാ പോലീസ് മേധാവി സ്വപ്നില്‍ മധുകര്‍ മഹാജന് ലഭിച്ച രഹസ്യസന്ദേശത്തെ തുടര്‍ന്നായിരുന്നു പരിശോധന.

      15 ലക്ഷത്തോളം രൂപ വിപണി മൂല്യമുള്ള 154 ഗ്രാം ലഹരി മരുന്നാണ് പന്തളം മണികണ്ഠനാല്‍ത്തറയ്ക്ക് സമീപമുള്ള ലോഡ്ജില്‍നിന്നും പിടികൂടിയത്. ഇവര്‍ ഉപയോഗിച്ചിരുന്ന ഒന്‍പതു മൊബൈല്‍ ഫോണും രണ്ട് ആഡംബരകാറും ഒരു ബൈക്കും പെന്‍ഡ്രൈവും പോലീസ് പിടിച്ചെടുത്തു. ഗര്‍ഭനിരോധന ഉറകള്‍, ലൈംഗിക ഉത്തേജനമരുന്ന്, കഞ്ചാവ് പൊതി, കുരുമുളക് സ്പ്രേ തുടങ്ങിയവയും സംഭവ സ്ഥലത്തുനിന്നും കണ്ടെടുത്തു. 

       വെള്ളിയാഴ്ച രാവിലെ ഷാഹിനയും രാഹുലും ഹോട്ടലില്‍ മുറിയെടുത്തിരുന്നു. പിന്നീട് മറ്റുള്ളവർ ഇവിടേക്ക് എത്തിച്ചേരുകയായിരുന്നു. വൻതുകയ്ക്കാണ് ഇവര്‍ ആവശ്യക്കാര്‍ക്ക് മയക്കുമരുന്ന് നല്‍കുന്നതെന്ന് പോലീസ് പറഞ്ഞു. ജില്ലാ നര്‍കോട്ടിക് സെല്‍ ഡിവൈ.എസ്.പിയും ഡാന്‍സാഫ് ജില്ലാ നോഡല്‍ ഓഫീസറുമായ കെ. എ. വിദ്യാധരൻ്റെ നേതൃത്വത്തിലാണ് പരിശോധന നടത്തിയത്.