കൊയിലാണ്ടി നഗരസഭ ലൈഫ് സമ്പൂർണ്ണ പാർപ്പിട പദ്ധതിയിൽ മികച്ച നേട്ടത്തിനുള്ള അവാർഡ് ഏറ്റുവാങ്ങി

   കൊയിലാണ്ടി: 2023 – 24 സാമ്പത്തിക വർഷം ലൈഫ് സമ്പൂർണ്ണ പാർപ്പിട പദ്ധതിയിൽ ജില്ലയിൽ മികച്ച നേട്ടം കൈവരിച്ചതിന് കൊയിലാണ്ടി നഗരസഭ മന്ത്രി മുഹമ്മദ് റിയാസിൽ നിന്ന് അവാർഡ് ഏറ്റുവാങ്ങി. ജില്ലയിൽ കൊയിലാണ്ടി നഗരസഭയ്ക്ക് രണ്ടാം സ്ഥാനമാണ് ലഭിച്ചത്. ലൈഫ് phase 1, Phase 2 ഘട്ടങ്ങളിലുള്ള ഭവനങ്ങളുടെ പൂർത്തീകരണത്തിനും പൂർത്തീകരണത്തിന് ആവശ്യമായ പ്രവർത്തനങ്ങൾക്കുമാണ് അവാർഡ് ലഭിച്ചത്.

   ഗുണഭോക്തൃ സംഗമങ്ങൾ കുടുംബാംഗങ്ങൾക്കായുള്ള ചിത്രരചന, ഉപന്യാസം മത്സരങ്ങൾ എന്നിവ സംഘടിപ്പിച്ചു. സാമ്പത്തികമായി പിന്നോക്കം നിൽക്കുന്ന കുടുംബങ്ങളുടെ വീട് പൂർത്തീകരണത്തിനായി വാർഡ് തല സമിതികൾ രൂപീകരിച്ച് കൂടുതൽ സാമ്പത്തിക സഹായങ്ങൾ നൽകുന്നതിന് സാധിച്ചു. നഗരസഭയുടെ മറ്റു പദ്ധതികളിൽ സംയോജനം നടത്തി കൂടുതൽ ഫണ്ടുകൾ ലഭ്യമാക്കുകയും ചെയ്തു. കുടുംബശ്രീ അയൽക്കൂട്ടങ്ങൾ, അയ്യങ്കാളി തൊഴിലുറപ്പ് പദ്ധതി, പട്ടികജാതി ഗുണഭോക്തൃകള്‍ ക്കായി വയറിങ്ങിനുള്ള പദ്ധതി, നഗര ഉപജീവന മിഷൻ എന്നിവയുമായി സംയോജിപ്പിച്ചു കൊണ്ട് ഗുണഭോക്താക്കൾക്ക് കൂടുതൽ ഫണ്ടുകൾ ലഭ്യമാക്കി.

    ലൈഫ് Phase 1, Phase 2 ഘട്ടങ്ങളിലായി 1522 ഗുണഭോക്താക്കളിൽ 1150 കുടുംബങ്ങൾക്ക് വീട് പൂർത്തീ കരിക്കാൻ സാധിച്ചു. മുഹമ്മദ് അബ്ദുറഹിമാൻ സാഹിബ് മെമ്മോറിയൽ ജൂബിലി ഹാളിൽ വച്ച് നടന്ന മികച്ച തദ്ദേശ സ്ഥാപനങ്ങളെ ആദരിക്കുന്ന ചടങ്ങിൽ വച്ചാണ് പൊതുമരാമത്ത് ടൂറിസം വകുപ്പ് മന്ത്രി അഡ്വ. മുഹമ്മദ് റിയാസിൽ നിന്നും നഗരസഭ ചെയർപേഴ്സൺ സുധ കിഴക്കേപ്പട്ട് അവാർഡ് ഏറ്റുവാങ്ങിയത്. ചടങ്ങിൽ ക്ഷേമകാര്യ സ്റ്റാൻഡിംഗ് സ്റ്റാൻഡിങ് കമ്മിറ്റി ചെയർമാൻ കെ. ഷിജു ആസൂത്രണസമിതി വൈസ് ചെയർമാൻ എ സുധാകരൻ, ലൈഫ് കോർഡിനേറ്റർ രചന വി ആർ എന്നിവർ പങ്കെടുത്തു.