വര്ക്കലയില് വീടിന് തീപിടിച്ച് പിഞ്ചുകുഞ്ഞടക്കം കുടുംബത്തിലെ അഞ്ചുപേര്ക്ക് ദാരുണാന്ത്യം
വർക്കല പുത്തന്ചന്തയില് പച്ചക്കറിക്കട നടത്തുന്ന പ്രതാപന്റെ കുടുംബത്തിനാണ് ദുരന്തമുണ്ടായത്.
NDR News
08 Mar 2022 06:55 AMതിരുവനന്തപുരം: വര്ക്കലയില് വീടിന് തീപിടിച്ച് കുടുംബത്തിലെ അഞ്ചുപേര് വെന്തുമരിച്ചു. വര്ക്കല അയന്തിയിൽ ഇന്ന് പുലർച്ചയാണ് സംഭവം.
വർക്കല പുത്തന്ചന്തയില് പച്ചക്കറിക്കട നടത്തുന്ന പ്രതാപന് (64), ഭാര്യ ഷെര്ലി (53), മകന് അഖില് (25), മരുമകള് അഭിരാമി (24), അഭിരാമിയുടെ എട്ടു മാസം പ്രായമായ കുഞ്ഞ് എന്നിവരാണ് മരിച്ചത്. പ്രതാപന്റെ മകൻ നിഖില് (24) ഗുരുതരമായി പൊള്ളലേറ്റ് അതീവ ഗുരുതരാവസ്ഥയിൽ തിരുവനന്തപുരത്തെ സ്വകാര്യ ആശുപത്രിയില് ചികിത്സയിലാണ്.
പുലര്ച്ചെ വീട്ടില് നിന്ന് തീയും പുകയും ഉയരുന്നത് കണ്ട അയല്വാസികളാണ് വിവരം അഗ്നിരക്ഷാസേനയെ അറിയിച്ചത്. വീടിന്റെ മുഴുവന് മുറികളിലേയ്ക്കും തീ പടര്ന്നിരുന്നു. ഏറെ പണിപ്പെട്ടാണ് വെളുപ്പിന് ആറു മണിയോടെ ഒരുവിധം തീയണയ്ക്കാന് കഴിഞ്ഞത്. വീടിന്റെ മുന്വശത്ത് നിര്ത്തിയിട്ടിരുന്ന ഇരുചക്രവാഹനങ്ങള്ക്കും തീപിടിച്ചു.
അപകടകാരണം എന്താണെന്ന് വ്യക്തമായിട്ടില്ലെന്ന് അഗ്നിരക്ഷാസേനയും പോലീസും അറിയിച്ചു. സംഭവത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്
