അട്ടപ്പാടി മധു വധകേസ്; വിധി ഈ മാസം 30ന്
കഴിഞ്ഞ വെള്ളിയാഴ്ചയാണ് കേസിലെ അന്തിമ വാദം പൂര്ത്തിയായത്.
NDR news
18 Mar 2023 01:25 PMപാലക്കാട്: ആദിവാസി യുവാവ് അട്ടപ്പാടി മധു വധകേസില് ഈ മാസം 30ന് കോടതി വിധി പറയും. മണ്ണാര്ക്കാട് എസ്സി-എസ്ടി കോടതിയാണ് വിധി മുപ്പതിലേക്ക് മാറ്റിയത്. മധുവിന്റെ
കൊലപാതകത്തില് കഴിഞ്ഞ വെള്ളിയാഴ്ചയാണ് അന്തിമ വാദം പൂര്ത്തിയായത്.
2018 ഫെബ്രുവരി 22നാണ് അട്ടപ്പാടി ആനവായ് കടുകമണ്ണ ഊരിലെ ആദിവാസി യുവാവ് മധുവിനെ മോഷണ കുറ്റമാരോപിച്ച് ഒരു സംഘമാളുകള് മധുവിനെ ക്രൂരമായി മര്ദ്ദിച്ച് കൊലപ്പെടുത്തിയത്. 16 പ്രതികളാണ് കേസിലുള്ളത്. മൂവായിരത്തിലധികം പേജുകളുളള കുറ്റപത്രത്തില് 127 സാക്ഷികളാണ് ഉണ്ടായിരുന്നത്. ഇതില് മധുവിന്റെ ബന്ധുക്കളുള്പ്പടെ 24 പേര് വിചാരണക്കിടെ കൂറുമാറിയിരുന്നു.
കൂറുമാറിയ വനം വകുപ്പിലെ താല്കാലിക ജീവനക്കാരായ നാലുപേരെ ജോലിയില് നിന്നും പിരിച്ചുവിട്ടു. ഇതിനിടെ കൂറുമാറിയ സാക്ഷികള് കോടതിയിലെത്തി പ്രോസിക്യൂഷന് അനുകൂല മൊഴി നല്കി. കോടതിയിലെത്താതെ മൂന്ന് പ്രോസിക്യൂട്ടര്മാരാണ് കേസില് നിന്നും മാറിയത്.
2022 ഫെബ്രുവരി 18നാണ് പുതിയ സ്പെഷ്യല് പ്രോസിക്യൂട്ടര് സി രാജേന്ദ്രനും അഡീഷണല് പ്രോസിക്യൂട്ടര് രാജേഷ് എം മേനോനും ഹാജരായത്. സാക്ഷി വിസ്താരം തുടരുന്നതിനിടെ സാക്ഷികള് നിരന്തരം കൂറു മാറിയതോടെ സ്പെഷ്യല് പ്രോസിക്യൂട്ടറെ മാറ്റണമെന്ന് മധുവിന്റെ അമ്മ മല്ലി ആവശ്യപ്പെടുകയും, രാജേഷ് എം മേനോനെ പ്രോസിക്യൂട്ടറായി നിയമിക്കുകയും ചെയ്യുകയായിരുന്നു. പ്രോസിക്യൂട്ടര്മാര് മാറി മാറിയെത്തിയ കേസ്, പതിനൊന്ന് മാസം നീണ്ട സാക്ഷി വിസ്താരത്തിന് ശേഷമാണ് വിധി പ്രഖ്യാപനത്തിലേക്ക് എത്തിയത്.
