തീ പിടുത്തമുണ്ടായ കോഴിക്കോട് ബേബി മെമ്മോറിയൽ ആശുപത്രിയിലെ തീ പൂർണമായും അണച്ചു

കോഴിക്കോട്: തീ പിടുത്തമുണ്ടായ കോഴിക്കോട് ബേബി മെമ്മോറിയൽ ആശുപത്രിയിലെ തീ പൂർണമായും അണച്ചു. ആശുപത്രി സി ബ്ലോക്കിലെ ഒമ്പതാം നിലയിൽ എസിയുടെ യന്ത്രഭാഗങ്ങൾ സൂക്ഷിക്കുന്ന ഭാഗത്താണ് തീപിടിത്തമുണ്ടായത്. ടെറസിന്റെ ഭാഗത്ത് എസിയുടെ ഭാഗങ്ങൾ വെച്ച സ്ഥലത്ത് നിന്നാണ് തീപടർന്നത്. രോഗികളെല്ലാം സുരക്ഷിതരാണെന്ന് ആശുപത്രി അധികൃതർ അറിയിച്ചു. 

     ഒമ്പതാം നിലയ്ക്ക് മുകളിലുള്ള ടെറസിൽ എസി ചില്ലർ ഇൻസ്റ്റലേഷൻ നടക്കുന്നതിനിടെയാണ് തീപടർന്നത്.സംഭവം ഉണ്ടായ ഉടൻ തന്നെ ജീവനക്കാർ തീയണച്ചെന്നും ആശുപത്രി എ.ജി.എം.പി.ആർ സലിൻ ശങ്കർ അറിയിച്ചു. ഫയർഫോഴ്‌സ് എത്തും മുമ്പേ തീയണച്ചിരുന്നെന്നും രോഗികൾക്ക് പ്രശ്‌നമൊന്നു മുണ്ടായിട്ടില്ലെന്നും സലിൻ ശങ്കർ പറഞ്ഞു.

    ആശുപത്രി പ്രവർത്തനം പൂർണതോതിൽ പുനരാരംഭിച്ചു. മുൻകരുതൽ എന്ന നിലയിലാണ് ആളുകളെ ഒഴിപ്പിച്ചത്. നിയമപ്രകാരമാണ് എസി ഭാഗങ്ങൾ സ്ഥാപിച്ചിരിക്കുന്നതെന്നും ആശങ്കപ്പെടേണ്ട സാഹചര്യമില്ലെന്നും ആശുപത്രി അധികൃതർ വ്യക്തമാക്കി. അതേസമയം, തീപിടിത്തത്തിന്റെ കാരണം വ്യക്തമായിട്ടില്ല. കോഴിക്കോട് ബീച്ച്, വെള്ളമാടുകുന്ന് എന്നിവിടങ്ങളിൽ നിന്നാണ് അഞ്ച് ഫയർ യൂണിറ്റുകൾ ആശുപത്രിയിലെത്തിയിരുന്നു