കോഴിക്കോട് എംഡിഎംഎ കൈവശം വെച്ച ബസ് ഡ്രൈവർ അറസ്റ്റിൽ

കോഴിക്കോട്: എംഡിഎംഎ കൈവശം വെച്ച കേസിൽ ബസ് ഡ്രൈവർ അറസ്റ്റിൽ.ബസ് ഡ്രൈവറായ വെങ്ങളം സ്വദേശി അജ്മൽ റഫീഖ് ആണ് പിടിയിലായത്. ഇയാളിൽ നിന്ന് 7 ഗ്രാം എംഡിഎംഎയും 2500 രൂപയും പൊലീസ് കണ്ടെടുത്തു. കോഴിക്കോട്– അന്നശ്ശേരി റൂട്ടിൽ സർവീസ് നടത്തുന്ന ബസിലെ ഡ്രൈവറായ അജ്മൽ റഫീഖ് ലഹരിക്കടിമയാണെന്നും ഡാൻസാഫ് സംഘത്തിന്റെ നിരീക്ഷണത്തിൽ ആയിരുന്നെന്നും പൊലീസ് അറിയിച്ചു. കഴിഞ്ഞ രാത്രി വേങ്ങേരി റോഡരികിൽ നിർത്തിയിട്ടിരുന്ന കാറിൽ ഇയാളെ കണ്ട പൊലീസ് സംഘം സംശയത്തെ തുടർന്ന് പരിശോധന നടത്തുകയായിരുന്നു.

      വേങ്ങേരി ചോറൂണി പൊയിൽതാഴത്ത് റോഡിനോട് ചേർന്ന വയലിൽ നിർത്തിയിട്ടിരുന്ന വെള്ള ടാക്സി കാറിലുണ്ടായിരുന്ന പ്രതിയുടെ പോക്കറ്റിൽ നിന്നാണ് ലഹരി മരുന്ന് കണ്ടെത്തിയത്. വിൽപ്പന ലക്ഷ്യത്തോടെ സ്ഥലത്തെത്തിയതാണെന്ന് പൊലീസ് പറഞ്ഞു. അറസ്റ്റ് രേഖപ്പെടുത്തി പ്രതിയെ കോടതിയിൽ ഹാജരാക്കി. ചേവായൂർ പൊലീസ് സ്റ്റേഷൻ സബ് ഇൻസ്പെക്ടർമാരായ നിമിൻ കെ. ദിവാകരൻ, അബ്ദു റഹ്മാൻ എന്നിവരുടെ നേതൃത്വത്തിലുള്ള സംഘമാണ് അറസ്റ്റ് നടത്തിയത്.