രോഗികൾക്ക് അവിശ്വാസമായി കാൻസർ മരുന്നുകളുടെ വില കുറയ്ക്കാൻ കേന്ദ്ര സർക്കാർ
കാൻസർ മരുന്നുകളുടെ ട്രേഡ് മാർജിൻ പരമാവധി 30 ശതമാനമാക്കി പരിമിതപ്പെടുത്തിക്കൊണ്ട് കേന്ദ്രസർക്കാർ ഉത്തരവിട്ടത് ആ മരുന്നുകളുടെ വില കുത്തനെ കുറയാൻ വഴിയൊരുക്കും
NDR news
09 Oct 2026 07:33 PMന്യൂഡൽഹി: രാജ്യത്തെ കാന്‍സര്‍ രോഗികള്‍ക്ക് വലിയ ആശ്വാസം നല്‍കിക്കൊണ്ട് കേന്ദ്ര സര്‍ക്കാരിന്റെ നിര്‍ണായക തീരുമാനം. കാന്‍സര്‍ മരുന്നുകളുടെ ട്രേഡ് മാര്‍ജിന്‍ പരമാവധി 30 ശതമാനമായി പരിമിതപ്പെടുത്താന്‍ കേന്ദ്ര സര്‍ക്കാര്‍ ഉത്തരവിട്ടു. സുപ്രിം കോടതിയുടെ കര്‍ശന നിര്‍ദേശത്തെ തുടര്‍ന്നാണ് ഈ ചരിത്രപരമായ നടപടി.
. പുതിയ തീരുമാനപ്രകാരം നാഷണല്‍ എസന്‍ഷ്യല്‍ മെഡിസിന്‍ ലിസ്റ്റില്‍ ഉള്‍പ്പെടാത്ത എല്ലാ പ്രൈവറ്റ്, ജനറിക്, ബ്രാന്‍ഡഡ്, ഇറക്കുമതി ചെയ്യുന്ന കാന്‍സര്‍ മരുന്നുകള്‍ക്കും ഈ പരിധി ബാധകമാകും. മരുന്ന് നിര്‍മ്മാതാക്കള്‍ വിതരണക്കാര്‍ക്കും റീട്ടെയിലര്‍മാര്‍ക്കും നല്‍കുന്ന വിലയും, ഉപഭോക്താക്കള്‍ക്ക് ഈടാക്കുന്ന പരമാവധി വിലയും തമ്മിലുള്ള അമിത വ്യത്യാസം ഒഴിവാക്കുകയാണ് ഇതിലൂടെ ലക്ഷ്യമിടുന്നത്.
. ഈ പുതിയ ഉത്തരവ് നടപ്പിലാകുന്നതോടെ വിപണിയില്‍ കാന്‍സര്‍ മരുന്നുകളുടെ വിലയില്‍ 70 ശതമാനം വരെ കുറവുണ്ടാകുമെന്നാണ് കണക്കാക്കുന്നത്. ഇതിലൂടെ രാജ്യത്തെ കാന്‍സര്‍ രോഗികള്‍ക്ക് പ്രതിവര്‍ഷം ഏകദേശം 2,500 കോടി രൂപയുടെ വലിയ സാമ്പത്തിക ലാഭമുണ്ടാകുമെന്നാണ് വിലയിരുത്തല്‍.
. 35 പേറ്റന്റുള്ള മരുന്നുകള്‍ ഉള്‍പ്പെടെ 110-ലധികം പ്രമുഖ കാന്‍സര്‍ പ്രതിരോധ മരുന്നുകളെ ഈ ഉത്തരവ് നേരിട്ട് സഹായിക്കും. നേരത്തെ, അവശ്യമരുന്നുകളുടെ പട്ടികയിലുള്ള 131 കാന്‍സര്‍ മരുന്നുകള്‍ക്ക് മാത്രമായിരുന്നു നാഷണല്‍ ഫാര്‍മസ്യൂട്ടിക്കല്‍ പ്രൈസിംഗ് അതോറിറ്റിയുടെ വിലനിയന്ത്രണം ഉണ്ടായിരുന്നത് .എന്നാല്‍ ഈ പുതിയ ഉത്തരവോടെ, പട്ടികയ്ക്ക് പുറത്തുള്ള മരുന്നുകള്‍ക്കുമേല്‍ വിതരണക്കാരും ആശുപത്രികളും ഈടാക്കിയിരുന്ന ഭീമമായ ലാഭവിഹിതം ഇല്ലാതാവുകയും, സാധാരണക്കാര്‍ക്ക് താങ്ങാനാവുന്ന നിരക്കില്‍ മരുന്നുകള്‍ ലഭ്യമാവുകയും ചെയ്യും. കാന്‍സര്‍ ചികിത്സാ രംഗത്തെ ചൂഷണങ്ങള്‍ക്ക് തടയിടുന്നതാണ് കേന്ദ്ര സര്‍ക്കാരിന്റെ പുതിയ നീക്കം.
