മദ്യപാനത്തിനിടെയുണ്ടായ തർക്കം കൊലപാതകത്തിൽ കലാശിച്ചു

പുൽപ്പള്ളി: വയനാട് പുൽപ്പള്ളി ആനപ്പാറയിലെ വാടകവീട്ടിൽ മദ്യപാനത്തിനിടെ ഉണ്ടായ തർക്കത്തെ തുടർന്ന് വെട്ടേറ്റു ഗുരുതരമായി പരിക്കേറ്റ് ചികിത്സയിലായിരുന്ന താമരശ്ശേരി കൂടത്തായ് അപ്പുറത്ത് പൊയ്കയിൽ ലൈജു (46) മരിച്ചു. കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെയാണ് മരണം.

.      ഇന്നലെ രാത്രി ഒമ്പതുമണിയോടെയാണ് ആനപ്പാറയിലെ വാടകവീട്ടിൽ ആക്രമണമുണ്ടായത്. മദ്യപാനത്തിനിടെ ഉണ്ടായ തർക്കമാണ് വെട്ടേറ്റ സംഭവത്തിലേക്ക് നയിച്ചതെന്നാണ് പ്രാഥമിക വിവരം.ഗുരുതരമായി പരിക്കേറ്റ ലൈജുവിനെ ഉടൻ കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും ചികിത്സയ്ക്കിടെ മരണം സംഭവിക്കുകയായിരുന്നു.

.    സംഭവത്തിൽ കഴുത്തിന് ഗുരുതരമായി വെട്ടേറ്റ കൊല്ലം തഴവ സ്വദേശി ഷഫീഖ് അബ്ദുൾ സലാം (35) മെഡിക്കൽ കോളേജ് ആശുപത്രിയിൽ ചികിത്സയിലാണ്.

.   സംഭവവുമായി ബന്ധപ്പെട്ട് തമിഴ്നാട് നാഗപട്ടണം സ്വദേശികളായ പനീർ ശെൽവം (58), ശേഖർ (63) എന്നിവരെ പൊലീസ് കസ്റ്റഡിയിലെടുത്തു.ആക്രമണത്തിലേക്ക് നയിച്ച സാഹചര്യം, സംഭവത്തിലെ മറ്റ് പങ്കാളിത്തങ്ങൾ എന്നിവ ഉൾപ്പെടെയുള്ള കാര്യങ്ങളിൽ പൊലീസ് വിശദമായ അന്വേഷണം നടത്തിവരികയാണ്.