സൂപ്പർ മാർക്കറ്റിൽ മോഷണം രണ്ട് വിദ്യാർഥികളെ പിടികൂടി

കോഴിക്കോട്: മാളിലുള്ള സൂപ്പർമാർക്കറ്റിൽ നിന്ന് സൗന്ദര്യവർധക ഉൽപ്പന്നങ്ങൾ മോഷ്ടിച്ചെന്ന കേസിൽ രണ്ട് വിദ്യാർത്ഥികളെ പോലീസ് പിടികൂടി. മലപ്പുറം സ്വദേശികളായ മുഹമ്മദ് ഷമീൽ (20), സബിത (19) എന്നിവരെയാണ് പന്തീരാങ്കാവ് പോലീസ് കസ്റ്റഡിയിലെടുത്തത്.

.      2026 ഒക്ടോബർ 18-ന് വൈകുന്നേരമാണ് കേസിനാസ്പദമായ സംഭവം നടന്നത്. സൂപ്പർമാർക്കറ്റിൽ വിൽപ്പനയ്ക്ക് വെച്ചിരുന്ന ഏകദേശം 8,000 രൂപ വിലവരുന്ന സൗന്ദര്യവർദ്ധക ഉൽപ്പന്നങ്ങൾ മോഷ്ടിച്ച് കൊണ്ടുപോയെന്നാണ് പരാതി.

.      സ്ഥാപനത്തിലെ ജീവനക്കാരനായ സുജിത് കുമാർ നൽകിയ പരാതിയുടെ അടിസ്ഥാനത്തിൽ പോലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. സംഭവസ്ഥലത്തെയും സമീപപ്രദേശങ്ങളിലെയും സി.സി.ടി.വി ദൃശ്യങ്ങൾ പരിശോധിച്ചാണ് പ്രതികളെ തിരിച്ചറിഞ്ഞതെന്നും തുടർന്ന് മെഡിക്കൽ കോളേജ് പരിസരത്തുനിന്ന് കസ്റ്റഡിയിലെടുത്തതെന്നുമാണ് പോലീസ് നൽകുന്ന വിവരം.

.     സബിതയ്‌ക്കെതിരെ നേരത്തെയും മോഷണക്കേസ് നിലവിലുണ്ടെന്ന് പോലീസ് അറിയിച്ചു. 2026 സെപ്റ്റംബർ 22-ന് അരയിടത്തുപാലത്തെ ഗോകുലം മാളിലെ സൂപ്പർമാർക്കറ്റിൽ നിന്ന് ഏകദേശം 1,000 രൂപ വിലവരുന്ന ചോക്ലേറ്റുകൾ മോഷ്ടിച്ചെന്ന കേസാണിത്.

.     പന്തീരാങ്കാവ് പോലീസ് സ്റ്റേഷനിലെ സബ് ഇൻസ്‌പെക്ടർമാരായ അർജുൻ,അജിത്ത്, വിനോദ്, സിവിൽ പോലീസ് ഓഫീസർ അപർണ, ഹോം ഗാർഡ് ജയരാജ് എന്നിവർ അന്വേഷണ സംഘത്തി ലുണ്ടായിരുന്നു.കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.