മട്ടന്നൂരിൽ റിട്ടയേർഡ് അധ്യാപികയും മകനും വെട്ടേറ്റ് മരിച്ച നിലയിൽ കണ്ടെത്തി.

​ കണ്ണൂർ: മട്ടന്നൂർ ലയൺസ് ക്ലബ് റോഡിലെ വീട്ടിൽ റിട്ടയേർഡ് അധ്യാപികയെയും മകനെയും വെട്ടേറ്റ് മരിച്ച നിലയിൽ കണ്ടെത്തി. റിട്ടയേർഡ് അധ്യാപിക ജ്യോതി (56), മകൻ നവീൻ കൃഷ്ണ (22) എന്നിവരാണ് കൊല്ലപ്പെട്ടത്. ഇന്ന് ചൊവ്വാഴ്ച്ച രാവിലെയോടെയായിരുന്നു നാടിനെ വിറങ്ങലിപ്പിച്ച സംഭവം പുറത്തറിയുന്നത്.

​.      വീടിന്റെ രണ്ടാം നിലയിലാണ് രണ്ടു മൃതദേഹങ്ങളും രക്തത്തിൽ കുളിച്ച നിലയിൽ കണ്ടെത്തിയത്. സംഭവസ്ഥലത്ത് നിന്ന് ചോരപുരണ്ട കറിക്കത്തി പോലീസ് കണ്ടെടുത്തിട്ടുണ്ട്.

.     മകൻ നവീൻ കൃഷ്ണ അമ്മയെ വെട്ടിക്കൊല പ്പെടുത്തിയ ശേഷം സ്വയം ജീവനൊടുക്കിയതാകാം എന്നാണ് പോലീസിന്റെ പ്രാഥമിക സംശയം.

​.     ജ്യോതിയുടെ ഭർത്താവ് പുറത്തുപോയി തിരികെ വീട്ടിലെത്തിയപ്പോഴാണ് ദാരുണമായ സംഭവം കാണുന്നത്. അദ്ദേഹത്തിന്റെ നിലവിളി കേട്ടാണ് അയൽവാസികൾ ഓടിയെത്തിയതും പോലീസിനെ വിവരമറിയിച്ചതും.

​.   കണ്ണൂർ സിറ്റി പോലീസ് കമ്മീഷണർ വിജയ് ഭാരത് റെഡ്ഡി ഉൾപ്പെടെയുള്ള ഉന്നത ഉദ്യോഗസ്ഥർ സ്ഥലത്തെത്തി അന്വേഷണത്തിന് നേതൃത്വം നൽകി. സയന്റിഫിക് സംഘവും വിരലടയാള വിദഗ്ധരും സ്ഥലത്തെത്തി ശാസ്ത്രീയ തെളിവുകൾ ശേഖരിച്ചു.

​      ഇൻക്വസ്റ്റ് നടപടികൾക്ക് ശേഷം മൃതദേഹങ്ങൾ വിശദമായ പോസ്റ്റ്മോർട്ടത്തിനായി തലശ്ശേരി ഗവൺമെന്റ് ജനറൽ ആശുപത്രി മോർച്ചറിയിലേക്ക് മാറ്റി.

​.       സംഭവത്തിന് പിന്നിലെ യഥാർത്ഥ കാരണം കണ്ടെത്താൻ പോലീസ് വിശദമായ അന്വേഷണം ആരംഭിച്ചിട്ടുണ്ട്.