ആത്മീയ ചൂഷക വ്യവസായത്തെ സമൂഹം ഒറ്റപ്പെടുത്തണം; ഡോ: ഹുസൈൻ മടവൂർ

ഉള്ളിയേരി: മത വിശ്വാസത്തിന്റെ പേരിൽ നടത്തുന്ന എല്ലാവിധ ആത്മീയ ചൂഷണങ്ങളിൽ നിന്നും വിശ്വാസികൾ വിട്ടു നിൽക്കണമെന്ന് കെ.എൻ.എം. സംസ്ഥാന ഉപാധ്യക്ഷൻ ഡോ. ഹുസൈൻ മടവൂർ ആവശ്യപ്പെട്ടു. 'ആത്മീയ ചൂഷണങ്ങൾക്കെതിരെ തൗഹീദീ മുന്നേറ്റം' എന്ന വിഷയത്തിൽ കെ.എൻ.എം. ഉള്ളിയേരി ശാഖാ ആനവാതിൽക്കലിൽ സംഘടിപ്പിച്ച പൊതു സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ദൈവത്തിന് സമ്പത്തും സമ്മാനങ്ങളും കാണിക്കകളും ആവശ്യമില്ലെന്നും അദ്ദേഹം പറഞ്ഞു.

       വി.പി. മുഹമ്മദ് അധ്യക്ഷത വഹിച്ചു. കെ.എൻ.എം. പ്രസിദ്ധീകരണ വിഭാഗം അഞ്ച് വാള്യങ്ങളായി പുറത്തിറക്കുന്ന കേരളനവോത്ഥാനം ചരിത്രവും ദർശനവും എന്ന ഗ്രന്ഥത്തിന്റെ ഒന്നാം വാള്യം ഉള്ളിയേരി ഗ്രാമ പഞ്ചായത്ത് വൈസ് പ്രസിഡന്റ് എൻ.എം. ബലറാമിന് ജില്ലാ പ്രസിഡന്റ് വി.പി. അബ്ദുസ്സലാം വിതരണം ചെയ്തു. ഒ.പി. നൗഷാദ് മൗലവി മങ്കട മുഖ്യപ്രഭാഷണം നടത്തി. 

       സാബിക് പുല്ലൂർ, ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയർ പേഴ്സൺ കെ. ബീന, കൂവിൽ കൃഷ്ണൻ, മഹല്ല് കോഡിനേഷൻ ചെയർമാൻ പി.കെ.ഐ. മുഹ്‌യുദ്ദീൻ, കെ.എൻ.എം. ജില്ലാ സെക്രട്ടറി എൻ.കെ.എം. സകരിയ്യ, ഐ.എസ്.എം. സെക്രട്ടരി ഷമീർ വാകയാട്, പോക്കർ, ഇബ്രാഹീം ഫാറൂഖി, അലി അസ്ഹർ മുളിയങ്ങൽ, സി.എം. അബ്ദുറഹിമാൻ, നൗഷാദ് കരുവണ്ണൂർ എന്നിവർ പ്രസംഗിച്ചു. അബ്ദുല്ലക്കോയ പി.സി. സ്വാഗതവും എം.കെ. സിനാൻ കക്കഞ്ചേരി നന്ദിയും പറഞ്ഞു. മത - സാമൂഹ്യ - സാംസ്കരിക രംഗത്തെ പ്രമുഖരും പ്രവർത്തകരുമടങ്ങിയ വൻ ജനാവലി സമ്മേളനത്തിനെത്തിയിരുന്നു.