കുറ്റകൃത്യങ്ങൾ പെരുകുന്നത് ആശങ്കാജനകം: കെ.എൻ.എം.

നടുവണ്ണൂർ: സമൂഹത്തിൽ കുറ്റകൃത്യങ്ങൾ നാൾക്കുനാൾ വർദ്ധിക്കുകയാണെന്നും ലഹരിയാണ് ഇതിനു പ്രധാന കാരണമെന്നും ലഹരിക്കെതിരെ സമൂഹമൊന്നിക്കണമെന്നും കെ.എൻ.എം. നടുവണ്ണൂർ ഏരിയ സംഗമം ആഹ്വാനം ചെയ്തു. മദ്യപാനത്തോടുള്ള നിസ്സാരസമീപനം വളർന്നു വരുന്ന തലമുറയെ തിന്മയിലേക്കാണ് എത്തിക്കുക. 

      ആലുവയിൽ നടന്ന ക്രൂരമായ കൊലപാതകം മന:സാക്ഷിയെ ഞെട്ടിക്കുന്നതാണ്. പ്രതിയുടെ ശിക്ഷ വേഗത്തിലാക്കാൻ അധികൃതർ നടപടി സ്വീകരിക്കണം. ആദർശ വീഥിയിൽ വിശുദ്ധിയോടെ വിവേകത്തോടെ എന്ന പ്രമേയത്തിൽ നടക്കുന്ന സംസ്ഥാന ക്യാമ്പെയിനിൻ്റെ ഭാഗമായി നടന്ന ഏരിയ സംഗമം കെ.എൻ.എം. ജില്ലാ സെക്രട്ടറി എൻ.കെ.എം. സകരിയ്യ ഉദ്ഘാടനം ചെയ്തു. 

      വി.പി. മുഹമ്മദ് അധ്യക്ഷത വഹിച്ചു. അടുത്ത ആറുമാസക്കാലയളവിലേക്കുള്ള കാംപയ്ൻ പ്രവർത്തനങ്ങളുടെ രൂപരേഖ അഹ്മദ് കാവിൽ അവതരിപ്പിച്ചു. ജാഫർ വാണിമേൽ, ഐ.എസ്.എം. ജില്ലാ സെക്രട്ടറി ഷമീർ വാകയാട്, ഫസലുറഹ്മാൻ, സി.എം. അബ്ദുറഹ്മാൻ, സാജിദ നടുവണ്ണൂർ, അമൽ ഹാദി, അബ്ദുസലാം മൗലവി പൂനത്ത്, ഇല്ലത്ത് അഹമദ്, റാനിയ നാസർ എന്നിവർ പ്രസംഗിച്ചു. എൻ. അബ്ദുറഷീദ് നന്ദി പറഞ്ഞു.