ലഹരിക്കെതിരെ ജനകീയ യുദ്ധത്തിന് തുടക്കമിടണം; കെ.എൻ.എം.

മേപ്പയൂർ: കക്ഷിരാഷ്ട്രീയത്തിനതീതമായി മുഴുവൻ സംഘടനകളും ലഹരിക്കെതിരെ ഒരേ സ്വരത്തിൽ മുന്നിട്ടിറങ്ങണമെന്ന് മേപ്പയൂർ മണ്ഡലം കെ.എൻ.എം. സംഗമം ആവശ്യപ്പെട്ടു. കെ.എൻ.എം. സംസ്ഥാന പ്രവർത്തക സമിതി അംഗം വി.പി. അബ്ദുസ്സലാം ഉദ്ഘാടനം ചെയ്തു. മണ്ഡലം പ്രസിഡന്റ് വി.വി അമ്മത് അദ്ധ്യക്ഷനായി.

      ഏറ്റവും കൊടിയ സാമൂഹിക വിപത്തായ ലഹരിക്കെതിരെയുള്ള ജനകീയ പോരാട്ടത്തിലേക്ക് നമ്മൾ ഒറ്റക്കെട്ടായി ഇറങ്ങിത്തിരിക്കേണ്ടതുണ്ട്. എങ്ങനെ മുറിച്ചുമാറ്റിയാലും ഭയാനകമായ കരുത്തോടെ വീണ്ടും ആഴത്തിലും, വ്യാപ്തിയിലും വേര് പടർത്തുന്ന ലഹരിസംഘങ്ങൾ കേരളത്തിന്റെ മുന്നിലുള്ള ഏറ്റവും അപകടകരമായ പ്രശ്നങ്ങളിലൊന്നായിക്കഴിഞ്ഞു. നഗരങ്ങൾ മുതൽ ഗ്രാമങ്ങൾ വരെ ലഹരിമരുന്നുകളുടെ ഉപയോക്താക്കളെയും, വിൽപ്പനക്കാരെയും കൊണ്ടുനിറയുന്നുണ്ട്. വലിയ നഗരങ്ങൾ വലിയ ലഹരിക്കയത്തിൽ മയങ്ങിക്കിടക്കുന്നു. ലഹരിക്കടത്തിന്റെ പുതുവഴികൾ കേരളം കേട്ടുകൊണ്ടിരിക്കുകയുമാണ്. ലഹരിയുടെ വലകൾ ചിന്തിക്കാൻ പോലുമാവാത്തവിധം സങ്കീർണവും ഭയാനകവുമായി മാറുന്നു. അതുകൊണ്ടുതന്നെ ലഹരിയോട് അനുഭാവം കാട്ടുന്ന വിദ്യാർത്ഥി യുവജന വിഭാഗത്തെ ബോധവത്‌കരിക്കാൻ പരമ്പരാഗത രീതികൾ വെടിഞ്ഞ് പുതിയ ഭാഷയും, ശൈലിയും പ്രയോഗിക്കണമെന്നും സംഗമം ആവശ്യപ്പെട്ടു. ലഹരി വിമുക്ത കാമ്പസുകൾ എന്ന ദൗത്യം ഏറ്റെടുത്ത് ജനകീയ യുദ്ധത്തിന് തുടക്കമിടേണ്ട സമയം അതിക്രമിച്ചിരിക്കുന്നു.

     കെ.എൻ.എം. സംസ്ഥാന സെക്രട്ടറി എ. അസ്ഗറലി, ഐ.എസ്.എം. സംസ്ഥാന ട്രഷറർ കെ.എം.എ. അസീസ്, സംസ്ഥാന വൈസ് പ്രസിഡന്റ് ഡോ. പി.കെ. ജംഷീർ ഫാറൂഖി, കെ.എൻ.എം. ജില്ല സെക്രട്ടറി എൻ.കെ.എം. സക്കരിയ്യ, മണ്ഡലം സെക്രട്ടറി കെ.കെ. കുഞ്ഞബ്ദുള്ള, എം.ജി.എം. ജില്ല സെക്രട്ടറി കെ. മറിയം, വി.കെ. അബ്ദുറഹ്മാൻ എന്നിവർ സംസാരിച്ചു.