കൊയിലാണ്ടിയിൽ പാർസൽ ലോറിയും കാറും കൂട്ടിയിടിച്ച് മൂന്നുപേർക്ക് പരിക്ക്

കൊയിലാണ്ടി: പാർസൽ ലോറിയും കാറും കൂട്ടിയിടിച്ചുണ്ടായ അപകടത്തിൽ മൂന്നുപേർക്ക് പരിക്കേറ്റു. മട്ടന്നൂർ സ്വദേശികളായ ശിവ പ്രസാദത്തിൽ രമണി(55), ഓമന( 50), ശരിൻ (30) എന്നിവർക്കാണ് പരിക്കേറ്റത്. ദേശീയപാതയിൽ ആർ ടി ഓഫീസിന് സമീപം ഇന്നു രാവിലെ 6-15 ഓടെയായിരുന്നു അപകടം.ഇടിയുടെ ആഘാതത്തിൽ കാർ പിക്കപ്പിനു മുന്നിൽ കുടുങ്ങി.

     വടകര ഭാഗത്തു നിന്നും കോഴിക്കോട് ഭാഗത്തേക്ക് പോകുകയായിരുന്ന കെഎൽ 07 ബിആർ- 0803 നമ്പർ കാറും കോഴിക്കോട് ഭാഗത്തു നിന്നും കണ്ണൂരിലെക്ക് പോകുകയായിരുന്ന കെഎൽ 11 ബിഎം 5309 ലോറിയുമാണ് കൂട്ടിയിടിച്ചത്. കൊയിലാണ്ടിയിൽ നിന്നും അഗ്നി രക്ഷാ സേന എത്തിയാണ് കാർ വേർപെടുത്തിയത്. പരിക്കേറ്റവരെ കോഴിക്കോട് മെഡിക്കൽ കോളെജിലേക്ക് കൊണ്ടുപോയി. ഇവരുടെ പരിക്ക് ഗുരുതരമെന്നാണ് വിവരം.

     ഇടിയുടെ ആഘാതത്തിൽ കാറിൻ്റെ മുൻഭാഗവും, പിക്കപ്പിൻ്റെ മുൻഭാഗവും തകർന്നു. അപകടത്തെ തുടർന്ന് ദേശീയപാതയിൽ ഗതാഗത സ്ത‌ംഭനമുണ്ടായി. കൊയിലാണ്ടി പോലീസ് സ്ഥലത്തെത്തി.