മേലടി ഉപജില്ലാ സ്കൂൾ കലോത്സവത്തിലെ താരമായി വന്മുകം - എളമ്പിലാട് എം.എൽ.പി. സ്കൂളിലെ അദ്വിത എസ്.
വ്യക്തിഗത ഇനങ്ങളിലും ഗ്രൂപ്പ് ഇനങ്ങളിലും മികച്ച പ്രകടനം കാഴ്ചവെച്ചാണ് അദ്വിത മത്സരത്തിലെ താരമായത്
NDR News
09 Nov 2025 07:02 PMചിങ്ങപുരം: സി.കെ.ജി എം.എച്ച്.എസ്.എസിൽ വെച്ച് നടക്കുന്ന മേലടി ഉപജില്ലാ സ്കൂൾ കലോത്സവത്തിൽ താരമായി വന്മുകം - എളമ്പിലാട് എം.എൽ.പി. സ്കൂളിലെ നാലാം ക്ലാസ് വിദ്യാർത്ഥിനി അദ്വിത എസ്. എൽ.പി. ജനറൽ വിഭാഗത്തിൽ പങ്കെടുത്ത മൂന്ന് വ്യക്തിഗത ഇനങ്ങളിൽ രണ്ടെണ്ണത്തിൽ എ ഗ്രേഡോടെ ഒന്നാം സ്ഥാനവും, ഒരെണ്ണത്തിൽ എ ഗ്രേഡോടെ മൂന്നാം സ്ഥാനവും കരസ്ഥമാക്കിയാണ് അദ്വിത സ്കൂളിന് അഭിമാനമായത്.
ഗ്രൂപ്പ് ഇനമായ ദേശഭക്തി ഗാനാലാപനത്തിൽ എ ഗ്രേഡോടെ രണ്ടാം സ്ഥാനവും നേടി. കൂടാതെ എൽ.പി. അറബിക് വിഭാഗത്തിൽ അറബി ഗാനത്തിലും, അറബിക് സംഘഗാനത്തിലും ടീമിനെ എ ഗ്രേഡോടെ ഒന്നാം സ്ഥാനത്തെത്തിക്കാനും ഈ കൊച്ചു മിടുക്കിക്ക് കഴിഞ്ഞു.
ജനറൽ വിഭാഗത്തിൽ 20 പോയിൻ്റും, അറബിക് വിഭാഗത്തിൽ 10 പോയിൻ്റും നേടി വന്മുകം എളമ്പിലാട് എം.എൽ.പി. സ്കൂളിന് മികച്ച നേട്ടമാണ് അദ്വിത നേടിക്കൊടുത്തത്. ചിങ്ങപുരം 'പ്രണവത്തിൽ' അദ്ധ്യാപകനായ വി.വി. ഷിജിത്തിൻ്റെയും, വി.കെ. മൃദുലയുടെയും മകളാണ് അദ്വിത.
