പാലോറ ഹയർ സെക്കണ്ടറി സ്കൂളിൽ ചന്ദ്രോത്‌സവും ശാസ്ത്ര സെമിനാറും നടത്തി

ഉള്ള്യേരി: പാലോറ ഹയർ സെക്കൻഡറി സ്കൂളിൽ ചന്ദ്രോത്സവത്തിന്റെ ഭാഗമായി 'ആർട്ടിമിസ് 2026' എന്ന പേരിൽ ഒരാഴ്ചക്കാലം നീണ്ടുനിന്ന ശാസ്ത്ര സെമിനാറും അനുബന്ധ പരിപാടികളും സംഘടിപ്പിച്ചു. പരിപാടിയുടെ ഔപചാരികമായ ഉദ്ഘാടനം ഉള്ള്യേരി ഗ്രാമപഞ്ചായത്ത് വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ സുഗമ ഹരിദാസ് നിർവഹിച്ചു. സ്കൂൾ ഹെഡ്മിസ്ട്രസ് ആർ.വി. സരിത ചടങ്ങിൽ അധ്യക്ഷത വഹിച്ചു.

       ​ഭാഭാ അറ്റോമിക് റിസർച്ച് സെന്ററിലേക്ക് (BARC) തിരഞ്ഞെടുക്കപ്പെട്ട ശാസ്ത്രജ്ഞൻ എസ്. ബാലഗോപാൽ ചടങ്ങിൽ മുഖ്യാതിഥിയായി പങ്കെടുത്തു. വിദ്യാലയത്തിൽ പുതുതായി ഒരുക്കിയ 'സ്മാർട്ടീൻ സ്റ്റുഡിയോ' എന്ന പുതിയ പഠന കേന്ദ്രവും, അതിൽ ഭാരതത്തിന്റെ ശാസ്ത്രപ്രതിഭകളെ ആദരിച്ചുകൊണ്ട് ഒരുക്കിയ 'ഭാരതം ബഹിരാകാശത്ത്' എന്ന പ്രത്യേക എക്സിബിഷനും അദ്ദേഹം ഉദ്ഘാടനം ചെയ്തു. ഈ എക്സിബിഷൻ ഏറെ ശ്രദ്ധേയമായി. വിദ്യാലയത്തിൽ പുതുതായി സജ്ജമാക്കിയ ഓഡിയോ വിഷ്വൽ ടിവി സ്പേസിന്റെ സ്വിച്ച് ഓൺ കർമ്മം സ്കൂൾ പിടിഎ പ്രസിഡണ്ട് ഇ.എം. ബഷീർ നിർവഹിക്കുകയും ചടങ്ങിന് ആശംസകൾ അർപ്പിച്ച് സംസാരിക്കുകയും ചെയ്തു.

​       ഒരാഴ്ചക്കാലം നീണ്ടുനിന്ന 'ആർട്ടിമിസ്' പരിപാടിയുടെ ഭാഗമായി ക്ലാസ് തലത്തിലും സ്കൂൾ തലത്തിലും ക്വിസ് മത്സരങ്ങൾ നടന്നു. ഓരോ ക്ലാസിലും ചന്ദ്രോത്സവത്തിനായുള്ള പ്രത്യേക ഒരുക്കങ്ങളും പഠനോത്പന്ന നിർമ്മാണങ്ങളും സംഘടിപ്പിച്ചിരുന്നു. കൂടാതെ, ബഹിരാകാശ യാത്രികരുടെ അനുഭവങ്ങൾ കുട്ടികൾക്ക് ലഭ്യമാക്കുന്നതിനായി 'മൂൺ വാക്ക്' എന്ന ആകർഷകമായ പ്രവർത്തനവും വിദ്യാലയത്തിൽ ഒരുക്കിയിരുന്നു.

​      കുട്ടികൾ തന്നെ പൂർണ്ണ ഉത്തരവാദിത്തം ഏറ്റെടുത്ത് അതിമനോഹരമായാണ് പരിപാടികൾ സംഘടിപ്പിച്ചത്. പരിപാടിയുടെ ഭാഗമായി ബി.ദക്ഷിൺ, നിയ മഹേഷ്, അൻവിക രതീഷ്, പാർവതി എസ്, ആർജ്ജ എസ്, ആർ വരദ എസ് എന്നീ വിദ്യാർത്ഥികൾ വിവിധ ബഹിരാകാശ ശാസ്ത്ര വിഷയങ്ങളെ ആസ്പദമാക്കി സെമിനാർ പേപ്പറുകൾ അവതരിപ്പിച്ചു. തുടർന്ന് ചന്ദ്രനുമായി ബന്ധപ്പെട്ട വിവിധ സർഗ്ഗാത്മക അവതരണങ്ങളും അരങ്ങേറി. കുട്ടികളുടെ മികച്ച സംഘാടനവും ശാസ്ത്രവിഷയങ്ങളിലെ അറിവും പരിപാടിക്ക് കൂടുതൽ മാറ്റുകൂട്ടി. വിദ്യാർത്ഥികൾ, അധ്യാപകർ, രക്ഷിതാക്കൾ തുടങ്ങിയവർ പരിപാടിയിൽ പങ്കെടുത്തു.