കക്കൂസ് മാലിന്യ നിക്ഷേപം; സഹികെട്ട് ജനങ്ങൾ

രാമനാട്ടുകര : ബൈപ്പാസിൽ കക്കൂസ് മാലിന്യം ഒഴുക്കൽ തുടർക്കഥയാകുന്നു. ഇതുമൂലം സഹികെട്ട് സമീപവാസികളും യാത്രക്കാരും. കഴിഞ്ഞ ദിവസം ബൈപ്പാസിൽ ഭാരത് ബെൻസ് ഷോറൂമിനു സമീപം വയലിൽ കക്കൂസ് മാലിന്യം ഒഴുക്കി. കിഴക്കുഭാഗത്തെ സർവീസ് റോഡിനോട് ചേർന്നാണ് കക്കൂസ് മാലിന്യം ഒഴുക്കിയത്. 

     ആറുവരിപ്പാതയുടെ നിർമാണം നടന്നു കൊണ്ടിരിക്കുകയാണ്.അതിനെ തുടർന്ന് റോഡിന്റെ ഇരുവശത്തുമുള്ള സർവീസ് റോഡിലൂടെയാണ് വാഹനങ്ങൾ പോകുന്നത്. സദാസമയവും വാഹനങ്ങൾ പോകുന്ന ഇവിടെ എങ്ങനെയാണ് ടാങ്കർലോറി നിർത്തി മാലിന്യം ഒഴുക്കുന്നതെന്ന് ആശ്ചര്യപ്പെട്ടിരിക്കുകയാണ് സമീപവാസികൾ.

     ബൈപ്പാസിൽ അറപ്പുഴയ്ക്കും പാറമ്മൽ ഭാഗത്തിനും ഇടയിൽ കക്കൂസ് മാലിന്യം ഒഴുക്കുന്നത് പതിവായിരിക്കുകയാണ്. വെള്ളം കെട്ടിനിൽക്കുന്ന വയലിൽ മാലിന്യം ഒഴുക്കുന്നതുമൂലം സമീപത്തെ കിണറുകളും മലിനമാകുകയാണ്. മാലിന്യം ഒഴുക്കിയ നിരവധി സംഭവം ഉണ്ടായിട്ടുണ്ടെങ്കിലും പ്രതികളെ പിടിക്കാൻ പോലീസിന് കഴിഞ്ഞിട്ടില്ല.