വഴിയാത്രക്കാരൻ്റെ ജീവൻ രക്ഷിച്ച കാവുന്തറയിലെ പോലീസുകാരൻ ബിനിൽ രാജിനെ ആദരിച്ചു

നടുവണ്ണൂർ: അവസരോചിതമായ ഇടപെടലിലൂടെ വഴിയാത്രക്കാരൻ്റെ ജീവൻ രക്ഷിച്ച പോലീസ് സേനയിലെ ബിനിൽ രാജിനെ സൗഹൃദം സ്വാശ്രയസംഘംകാവിൽ ആദരിച്ചു. കോഴിക്കോട് എരഞ്ഞിപ്പാലത്ത് വച്ച് കഴിഞ്ഞ ആഴ്ച ബസിനടിയിൽ പെടുമായിരുന്ന വഴിയാത്രക്കാരനെ ഡ്യൂട്ടിയിലുണ്ടായിരുന്ന ബിനിൽ രാജ് അത്ഭുതകരമായി രക്ഷിക്കുകയായിരുന്നു. അദ്ദേഹം അറിയാതെ തന്നെ ഈ രക്ഷാപ്രവർത്തനത്തിന്റെ വീഡിയോ സമൂഹമാധ്യമങ്ങളിലൊന്നാകെ കഴിഞ്ഞ ദിവസങ്ങളിൽ പ്രചരിക്കുന്നുണ്ടായിരുന്നു.   

     സീനിയർ ഫയർ ആൻ്റ് റെസ്ക്യൂ ഓഫീസർ റഫീക്ക് കാവിൽ ഉദ്ഘാടനം ചെയ്തു. അത്തോളി സബ് ഇൻസ്പക്ടർ ജയേഷ് ടി പി ഉപഹാരം നൽകി. സബ്ജില്ലാ കലോത്സവത്തിൽ എ ഗ്രേഡ് നേടിയ വരലക്ഷ്മി , വേദലക്ഷ്മി ,നിധിന , കൂടാതെ എൽഎസ്എസ് വിജയി പാർത്ഥിവ് ബിജു എന്നിവരെയും ആദരിച്ചു. ചന്ദ്രൻ പുതുശ്ശേരി, സി.കെ ബാലകൃഷ്ണൻ മാസ്റ്റർ, ഗിരീഷ് പുതുശ്ശേരി, ബിജു കാവിൽ ,ലീന കെ പി, ബീന പുതുശ്ശേരി, സി എം ശശി എന്നിവർ സംസാരിച്ചു. തുടർന്ന് പ്രാദേശിക കലാകാരന്മാർ അവതരിപ്പിച്ച എല്ലാരും പാടണ് എന്ന പരിപാടിയും അരങ്ങേറി.