കുറ്റ്യാടിയിൽ ബസ്സും ലോറിയും കൂട്ടിയിടിച്ച് നിരവധി പേർക്ക് പരിക്ക്

കുറ്റ്യാടി: നരിക്കൂട്ടുംചാലിൽ സ്വകാര്യ ബസ്സും ടിപ്പർ ലോറിയും കൂട്ടിയിടിച്ച് അപകടം. അപകടത്തിൽ നിരവധി ബസ് യാത്രക്കാർക്ക് പരിക്കേൽക്കുകയും ടിപ്പർ ലോറി ഡ്രൈവർക്ക് ഗുരുതരമായി പരിക്കേൽക്കുകയും ചെയ്തു.

      എതിരെ വന്ന ടിപ്പർ ലോറിയുമായി ബസ് നേർക്കുനേർ കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ ടിപ്പറിന്റെ കേബിനുള്ളിൽ കുടുങ്ങിപ്പോയ ഡ്രൈവറെ ചേലക്കാട്ടിൽ നിന്നെത്തിയ ഫയർഫോഴ്സ് സംഘമാണ് ഏറെ പ്രയത്നിച്ച് പുറത്തെടുത്തത്. അപകടം നടന്നയുടൻ പ്രദേശവാസികളും മറ്റു വാഹനയാത്രക്കാരും ചേർന്ന് ഉടൻ തന്നെ രക്ഷാപ്രവർത്തനം ആരംഭിച്ചു.

     പരിക്കേറ്റ മുഴുവൻ ആളുകളെയും ഉടനടി കുറ്റ്യാടി ഗവൺമെന്റ് ആശുപത്രിയിൽ പ്രവേശിപ്പിച്ചു.  സംഭവ സ്ഥലത്തെത്തിയ പോലീസ് ഗതാഗത തടസ്സം ഒഴിവാക്കാനായി അപകടത്തിൽപ്പെട്ട വാഹനങ്ങൾ റോഡിൽ നിന്ന് നീക്കം ചെയ്യുകയും ഗതാഗതം പുനഃസ്ഥാപിക്കുകയും ചെയ്തു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.