പെട്രോൾ ഒഴിച്ച് ആത്മഹത്യാശ്രമം: ചികിത്സയിലായിരുന്ന വയോധികൻ മരിച്ചു

കൊയിലാണ്ടി: ചേമഞ്ചേരി കാഞ്ഞിലശ്ശേരിയിൽ വയോധികൻ ശരീരത്തിൽ പെട്രോൾ ഒഴിച്ച് ആത്മഹത്യ ചെയ്തു. കാഞ്ഞിലശ്ശേരി പടിക്കൽ കണ്ടി രവി (65) ആണ് കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ മരണപ്പെട്ടത്.

      വ്യാഴാഴ്ച രാത്രി 9.30-ഓടെ മുൻ ചേമഞ്ചേരി ഗ്രാമപഞ്ചായത്ത് അംഗം ഇ. അനിൽകുമാറിന്റെ വീട്ടുപറമ്പിൽ വെച്ചായിരുന്നു സംഭവം. ശരീരത്തിൽ പെട്രോളൊഴിച്ച് തീകൊളുത്തിയ രവിയെ, തീ ആളിപ്പടരുന്നത് കണ്ട സമീപവാസികളാണ് ആദ്യം രക്ഷപ്പെടുത്താൻ ശ്രമിച്ചത്. നാട്ടുകാർ വിവരമറിയിച്ചതിനെ തുടർന്ന് കൊയിലാണ്ടി പോലീസും ഫയർഫോഴ്‌സും സ്ഥലത്തെത്തി.

         ഫയർഫോഴ്‌സ് ഏർപ്പാടാക്കിയ ആംബുലൻസിൽ രവിയെ ഉടൻ തന്നെ താലൂക്ക് ആശുപത്രിയിൽ എത്തിച്ചെങ്കിലും, പൊള്ളൽ ഗുരുതരമായതിനാൽ പ്രാഥമിക ചികിത്സയ്ക്ക് ശേഷം കോഴിക്കോട് മെഡിക്കൽ കോളേജ് ആശുപത്രിയിലേക്ക് മാറ്റുകയായിരുന്നു. വെള്ളിയാഴ്ച ചികിത്സയിലിരിക്കെയാണ് മരണം സംഭവിച്ചത്.

      സംഭവത്തിന് പിന്നിലെ കാരണം വ്യക്തമല്ല. സംഭവത്തിൽ കൊയിലാണ്ടി പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

​