കൊയിലാണ്ടിയിൽ കെട്ടിടത്തിൽനിന്ന് വീണ് പശ്ചിമ ബംഗാൾ സ്വദേശി മരിച്ചു

കൊയിലാണ്ടി: കൊയിലാണ്ടിയിൽ കെട്ടിടത്തിൽനിന്ന് വീണ് പശ്ചിമ ബംഗാൾ സ്വദേശി അഭിഷേക് (26) മരിച്ചു. വ്യാഴാഴ്ച പുലർച്ചെ നാലുമണിയോടെ കൊയിലാണ്ടി ബസ് സ്റ്റാൻഡിന് സമീപമുള്ള ബി.എസ്.എം. കോംപ്ലക്സിന്റെ താഴത്തെ നിലയിൽ ഇയാളെ മരിച്ച നിലയിൽ കണ്ടെതാണ്.

.    കഴിഞ്ഞ ഏതാനും വർഷങ്ങളായി മാതാപിതാക്കൾക്കൊപ്പം കൊയിലാണ്ടിയിൽ താമസിച്ചുവരികയായിരുന്നു അഭിഷേക്. കൊയിലാണ്ടി ബസ് സ്റ്റാൻഡിലെ ഹോട്ടലിൽ ജീവനക്കാരനായിരുന്നു.

.     കെട്ടിടത്തിന് സമീപത്തുള്ളവർ വിവരം അറിയിച്ചതിനെത്തുടർന്ന് കൊയിലാണ്ടി പോലീസ് സ്ഥലത്തെത്തി. മൃതദേഹം കൊയിലാണ്ടി താലൂക്ക് ആശുപത്രിയിലേക്ക് മാറ്റി. ഇൻക്വസ്റ്റ് നടപടികൾ പൂർത്തിയാക്കിയശേഷം കോഴിക്കോട് മെഡിക്കൽ കോളേജ് ആശുപത്രി മോർച്ചറിയിലേക്ക് മാറ്റി.

.      കെട്ടിടത്തിൽനിന്ന് വീഴാനിടയായ സാഹചര്യം വ്യക്തമല്ല.