ഇടതുപക്ഷ ട്രേഡ് യൂണിയൻ നേതാവ് കെ പി സഹദേവൻ (84 ) അന്തരിച്ചു

കണ്ണൂർ: ട്രേഡ് യൂണിയൻ നേതാവും സിപിഐ എം മുൻ സംസ്ഥാന കമ്മിറ്റി അംഗവുമായ കെ പി സഹദേവൻ (84) അന്തരിച്ചു. വാർധക്യ സഹജമായ അസുഖത്തെ തുടർന്ന്‌ കണ്ണൂർ എ കെ ജി ആശുപത്രിയിൽ ചികിത്സയിലായിരുന്നു. ഇന്ന് ഉച്ചക്ക് ഒന്നരയോടെയാണ്‌ അന്ത്യം

.     പതിനെട്ടാം വയസിൽ ട്രേഡ്‌ യൂണിയൻ പ്രവർത്തനം ആരംഭിച്ച അദ്ദേഹം സി ഐ ടി യു നേതാവായിരുന്നു. പ്രാഥമിക വിദ്യാഭ്യാസത്തിനുശേഷം ബീഡിതെറുപ്പുകാരനായി ജീവിതമാരംഭിച്ച കെ പി ടുബാക്കോ വർക്കേഴ്സ് യൂണിയൻ കണ്ണോത്തുംചാൽ ഡിവിഷൻ സെക്രട്ടറിയായാണ് പൊതുപ്രവർത്തനം തുടങ്ങുന്നത്‌. 

.     തുടർന്ന്‌ എണ്ണമറ്റ യൂണിയനുകൾക്ക് രൂപം കൊടുക്കുകയും നേതൃത്വം വഹിക്കുകയും ചെയ്തു. സിഐടിയു അഖിലേന്ത്യാ വർക്കിങ് കമ്മിറ്റിയംഗം, ബീഡി ആന്റ് സിഗാർ വർക്കേഴ്സ് ഫെഡറേഷൻ സംസ്ഥാന സെക്രട്ടറി, അഖിലേന്ത്യാ വൈസ് പ്രസിഡണ്ട് എന്നീ നിലകളിലും പ്രവർത്തിച്ചു.അടിയന്തരാവസ്ഥക്കാലത്ത് "മിസ' പ്രകാരം ഇരുപത് മാസം ജയിലിലായി. വിവിധ കാലയളവിൽ രണ്ടുവർഷത്തോളം വേറെയും ജയിലിൽ കഴിഞ്ഞു. 

.     1955‐56ൽ കമ്യൂണിസ്റ്റ് പാർടി അംഗമായി. 1964ൽ സിപിഐ എം രൂപം കൊണ്ടതുമുതൽ 78 വരെ കണ്ണൂർ മുനിസിപ്പൽ ലോക്കൽ സെക്രട്ടറി. 78ൽ ജില്ലാ കമ്മിറ്റി അംഗം. 86 മുതൽ ജില്ലാ സെക്രട്ടറിയറ്റ്‌ അംഗം. 2005ൽ സംസ്ഥാന കമ്മിറ്റി അംഗമായി. 2022ൽ സംസ്ഥാന കമ്മിറ്റിയിൽ നിന്ന്‌ ഒഴിഞ്ഞു. 2006ൽ കണ്ണൂർ നിയമസഭ മണ്ഡലത്തിൽ എൽഡിഎഫ്‌ സ്ഥാനാർഥി യായിരുന്നു. എളയാവൂർ കണ്ണോത്തുംചാലിലെ പരേതരായ കുഞ്ഞിരാമന്റെയും കെ പി താലയുടെയും മകനാണ്.

.     കണ്ണൂർ ടൗൺ സർവീസ് സഹകരണ ബാങ്ക്‌ മാനേജരായിരുന്ന എ കെ കൗസല്യയാണ് ഭാര്യ. മക്കൾ : കെ പി സജീവൻ (ഇന്റീരിയർ വർക്ക്‌ഷോപ്പ്‌ ഉടമ) രാജീവൻ( ബയോഡ്രോപ്പ്‌സ്‌ വാട്ടർ പ്യൂരിഫയർ എംഡി) ഷമീർ(ഇംഗ്ലണ്ട്‌) മരുമക്കൾ: ജസിത(അഭിഭാഷക), പ്രീഷ്‌മ(കണ്ണോത്തുംചാൽ) സംയുക്ത(ഇംഗ്ലണ്ട്‌) സഹോദരങ്ങൾ: പരേതരായ യശോദ, ശ്രീമതി.