ആനപ്പാറയിൽ സാറ്റലൈറ്റ് സർവ്വേ നടത്തുന്നതിന് റവന്യൂമന്ത്രി ഇടപെടണം: സി. പി. എ. അസീസ്‌

മേപ്പയ്യൂർ: കീഴരിയൂർ പഞ്ചായത്തിലെ ആനപ്പാറ കരിങ്കൽ ക്വാറിയിലെ ഖനനവുമായി ബന്ധപ്പെട്ട് പരിസരവാസികൾക്കുള്ള ആശങ്ക അകറ്റുന്നതിനു വേണ്ടി സാറ്റലൈറ്റ് സർവ്വേനടത്താൻ റവന്യൂമന്ത്രി അടിയന്തിരമായി ഇടപെടണമെന്ന് മുസ്‌ലിം ലീഗ് ജില്ലാ സെക്രട്ടറി സി. പി. എ. അസീസ് ആവശ്യപ്പെട്ടു. ക്വാറി ഖനനവുമായി ബന്ധപ്പെട്ട് സമരം ചെയ്തുവരുന്ന പരിസരവാസികളെയും, സമരകേന്ദ്രവും, ക്വാറിയും സന്ദർശിച്ചതിനു ശേഷം സംസാരിക്കുകയായിരുന്നു അദ്ദേഹം.

      ക്വാറിയിലെ ഖനനം സമീപത്തെ വീടുകൾക്കും, ജനങ്ങൾക്കും ഭീഷണിയായി മാറിയിരിക്കുന്ന സാഹചര്യത്തിൽ ക്വാറി സ്ഥിരമായി അടച്ചുപൂട്ടാൻ സർക്കാർ നടപടി കൈക്കൊള്ളണമെന്നും അദ്ദേഹം കൂട്ടിച്ചേർത്തു.

      മുസ്‌ലിംലീഗ് നിയോജകമണ്ഡലം പ്രസിഡന്റ് ആർ.കെ മുനീർ, പഞ്ചായത്ത് മുസ്‌ലിം ലീഗ് പ്രസിഡന്റ് ടി. യു. സൈനുദ്ദീൻ, ജനറൽ സെക്രട്ടറി നൗഷാദ് കുന്നുമ്മൽ, സത്താർ കിഴരിയൂർ, അൻസിൽ ആമിയാസ്, സാബിറ നടുക്കണ്ടി എന്നിവരുടെ നേതൃത്വത്തിലാണ് സമരം നടന്നു വരുന്നത്.