യൂത്ത് കോണ്ഗ്രസ് വ്യാജ തിരിച്ചറിയല് കാര്ഡ് നിര്മ്മാണം; ഡിജിപിക്ക് പരാതി നല്കി ബിജെപി
തിരിച്ചറിയല് കാര്ഡ് നിര്മ്മിക്കാന് ഒരു പാസ്പോര്ട്ട് സൈസ് ഫോട്ടോ മാത്രം മതിയെന്നത് ഞെട്ടിക്കുന്നത്
NDR News
17 Nov 2023 06:36 AMതിരുവനന്തപുരം: വ്യാജ തിരിച്ചറിയല് കാര്ഡ് നിര്മ്മിച്ച് യൂത്ത് കോണ്ഗ്രസ് സംഘടനാ തിരഞ്ഞെടുപ്പില് വോട്ട് രേഖപ്പെടുത്തിയ സംഭവത്തില് പൊലീസ് മേധാവിക്ക് പരാതി നല്കി ബിജെപി. സംസ്ഥാന അധ്യക്ഷന് കെ സുരേന്ദ്രനാണ് പരാതി നല്കിയത്. റിസിആര് കാര്ഡെന്ന അപ്ലിക്കേഷന് ഉപയോഗിച്ച് തിരഞ്ഞെടുപ്പ് കമ്മീഷന്റെ തിരിച്ചറിയല് കാര്ഡ് നിര്മ്മിക്കാന് ഒരു പാസ്പോര്ട്ട് സൈസ് ഫോട്ടോ മാത്രം മതിയെന്നത് ഞെട്ടിക്കുന്നതാണെന്ന് പരാതിയില് ചൂണ്ടികാട്ടുന്നു. രാജ്യസുരക്ഷയെയും ജനാധിപത്യ പ്രക്രിയയെയും ബാധിക്കുന്ന ഈ സംഭവത്തില് സുതാര്യമായ അന്വേഷണം നടത്തണമെന്ന് ബിജെപി ആവശ്യപ്പെട്ടു.
വിഷയത്തില് അന്വേഷണം ആവശ്യപ്പെട്ട് തിരഞ്ഞെടുപ്പ് കമ്മീഷനെ സമീപിക്കാനും ബിജെപി ആലോചിക്കുന്നുണ്ട്.ഒരു കോണ്ഗ്രസ് എംഎല്എയുടെ നേതൃത്വത്തിലാണ് തിരിച്ചറിയല് കാര്ഡ് തയ്യാറാക്കുന്നതിനുള്ള ആപ്പ് നിര്മ്മിച്ചതെന്നും പ്രതിപക്ഷ നേതാവ് വി ഡി സതീശന്റെയും എഐസിസി ജനറല് സെക്രട്ടറി കെ സി വേണുഗോപാലിന്റെയും അറിവോടെയാണ് ഇതെന്നും കെ സുരേന്ദ്രന് ആരോപിച്ചിരുന്നു.
രാഹുല് ഗാന്ധിയുടെ തിരിച്ചറിയല് കാര്ഡ് തയ്യാറാക്കുന്ന മാതൃക വീഡിയോ ഉള്പ്പെടെയായിരുന്നു പരാതിക്കാര് എഐസിസിക്ക് കൈമാറിയിരിക്കുന്നത്. പേരും മേല്വിലാസവും ഉള്പ്പെടെ വിവരങ്ങള് നല്കിയാല് 5 മിനിറ്റിനകം യഥാര്ത്ഥ തിരിച്ചറിയല് കാര്ഡിനെ വെല്ലുന്ന രീതിയില് വ്യാജ കാര്ഡ് ലഭിക്കുന്ന തരത്തിലാണ് സംവിധാനം.
