കാനത്തിൽ പങ്കെടുത്ത അവസാന പൊതുപരിപാടി കൊയിലാണ്ടിയിലെ ഷോപ്പിംഗ് കോംപ്ലക്സ് ഉദ്ഘാടനം

കൊയിലാണ്ടി: മധ്യാഹ്നത്തിലും യൗവനത്തിന്റെ ചുറുചുറുക്കോടെ ഓടിനടന്ന കാനത്തിൽ ജമീല എന്ന സിപിഐഎം നേതാവിന്റെയും പൊതു പ്രവർത്തകയുടെയും അവസാന പൊതുപരിപാടി കൊയിലാണ്ടിയിലെ ഷോപ്പിംഗ് കോംപ്ലക്സ് ഉദ്ഘാടന ചടങ്ങായിരുന്നു. ഒക്ടോബർ 25ന് നടന്ന ഉദ്ഘാടന ചടങ്ങിലെ അധ്യക്ഷ എന്ന നിലയിൽ എംഎൽഎയുടെ പ്രസംഗം വികാര നിർഭരമായിരുന്നു വെന്ന് പാർട്ടി പ്രവർത്തകർ ഓർത്തെടുക്കുന്നു. അതിനുമുമ്പ് മാസങ്ങളോളം പൊതുപരിപാടികളിൽ നിന്നെല്ലാം അകന്നുനിന്ന കാനത്തിൽ ജമീല, തന്റെ സ്വപ്ന സാക്ഷാത്കാരമായ ഷോപ്പിംഗ് കോംപ്ലക്സ് ഉദ്ഘാടന ചടങ്ങിൽ അവശയെങ്കിലും സന്തോഷവതിയായി കാണപ്പെട്ടു.

    "എനിക്ക് പങ്കെടുക്കുവാൻ സാധിച്ചതില് വളരെ വളരെ സന്തോഷമുണ്ട്. എല്ലാവരെയും ഒന്നിച്ച് കാണാൻ കഴിഞ്ഞതിലും വളരെ സന്തോഷം അറിയിച്ചു കൊണ്ട് ഞാനെൻറെ അധ്യക്ഷപ്രസംഗം അവസാനിപ്പിക്കുന്നു".പൊതുവേ പ്രസന്നമായി ഏറെ സമയം സംസാരിക്കാറുള്ള ജമീലയുടെ ആറ്റി കുറുക്കിയ സംസാരം സദസ്സിനെ അഭിസംബോധന ചെയ്‌ത്‌ ഇത്രയും പറഞ്ഞ് അവസാനിപ്പിച്ചു. മൂന്നുപതിറ്റാണ്ട് പൊതുരംഗത്ത് തിളങ്ങി നിന്ന ഒരാൾ രോഗാവസ്ഥ കാരണം മാസങ്ങളോളം പുറത്തിറങ്ങാനാവാതെ കഴിയേണ്ടി വന്നതിൻ്റെ വിഷമം കാനത്തിൽ ജമീലയുടെ സംസാരത്തിലും ശരീരഭാഷയിലും നിഴലിച്ചിരുന്നു.

    പൊതുരംഗത്ത് ഒപ്പമുണ്ടാകുന്ന ജനപ്രതിനിധികളെയും കൊയിലാണ്ടിയിലെ ജനങ്ങളെയും ഒരുമിച്ചു കണ്ടതിന്റെ സന്തോഷവും ആവേശവുമെല്ലാം ആ വാക്കുകളിൽ നിറഞ്ഞു. രോഗത്തെ അതി ജീവിച്ച് അധികം വൈകാതെ അവർ പൊതുരംഗത്ത് സജീവാകുമെന്ന പ്രതീക്ഷ നൽകിയ പരിപാടിയായിരുന്നു അത്. എന്നാൽ കൊയിലാണ്ടിക്കാരെ ദുഃഖത്തിലാഴ്ത്തി 59 ആമത്തെ വയസ്സിൽ അവർ ഈ ലോകത്തോട് തന്നെ വിട പറയുകയാണ്. ജമീലയുടെ സംസാരത്തിന്റെ ശബ്ദ സൗകുമാര്യം ഏത് സദസ്സിനെയും കയ്യിലെടുക്കാവുന്ന വിധം ശ്രോതാക്കളുടെ ഹൃദയത്തിൽ തട്ടുന്നതാണ്. രാഷ്ട്രീയം വരുമ്പോൾ ആവേശത്തോടെയും അല്ലാത്തവ അതിനനുസരിച്ച വികാരങ്ങളോടെയും ശ്രുതിമധുരമായ ശബ്ദത്തിൽ അവതരിപ്പിക്കുന്ന ജമീലയുടെ വാക്കുകൾ സദസ്സ് സാകൂതം കേട്ടുനിന്നു. മകൻ വിദേശത്തുനിന്ന് എത്തിയശേഷം ചൊവ്വാഴ്ച വൈകിട്ട് ആറുമണിക്ക് അത്തോളി കുനിയിൽ കടവ് ജുമാ മസ്ജിദ് ഖബർസ്ഥാനിൽ കബറടക്കും.