ഏകീകൃത സിവിൽ കോഡ് 2029 നുള്ളിൽ നടപ്പിലാക്കുമെന്ന് കേന്ദ്ര ആഭ്യന്തരമന്ത്രി അമിത് ഷാ

2029-ലെ ലോക്സഭാ തിരഞ്ഞെടുപ്പിന് മുൻപ് രാജ്യത്തെ 21 സംസ്ഥാനങ്ങളിൽ ഏകീകൃത സിവിൽ കോഡ് (യുസിസി) നടപ്പിലാക്കുമെന്ന് കേന്ദ്ര ആഭ്യന്തര മന്ത്രി അമിത് ഷാ. പ്രധാനമന്ത്രി നരേന്ദ്ര മോദിയുടെ ജന്മദിനം മുതൽ 30 ദിവസത്തെ 'സേവാ സങ്കൽപ് അഭിയാൻ' പരിപാടികൾ പ്രഖ്യാപിച്ചുകൊണ്ടാണ് അദ്ദേഹം ഇക്കാര്യം വ്യക്തമാക്കിയത്. പല സംസ്ഥാനങ്ങളിലും ഏകീകൃത സിവിൽ കോഡ് അവതരിപ്പിച്ചെന്നും ബിജെപി നേതൃത്വത്തിലുള്ള എൻഡിഎ ഭരണത്തിലുള്ള 21 സംസ്ഥാനങ്ങളിലും 2029-ന് മുൻപ് യുസിസി നടപ്പിലാക്കാൻ കഴിയുമെന്ന് തനിക്ക് ഉറപ്പുണ്ടെന്നും മുംബൈയിൽ മാധ്യമങ്ങളോട് അമിത് ഷാ പറഞ്ഞു

നിലവിൽ ഡൽഹി, പശ്ചിമ ബംഗാൾ, അസം, ഉത്തരാഖണ്ഡ്, രാജസ്ഥാൻ, മഹാരാഷ്ട്ര, ബിഹാർ, ഉത്തർപ്രദേശ് ഉൾപ്പെടെ 19 സംസ്ഥാനങ്ങളിലും രണ്ട് കേന്ദ്രഭരണ പ്രദേശങ്ങളിലും ബിജെപി നേതൃത്വത്തിലുള്ള എൻഡിഎ ആണ് അധികാരത്തിലുള്ളത്. ഉത്തരാഖണ്ഡ്, ഗുജറാത്ത്, അസം എന്നിവ ഇതിനകം തന്നെ യുസിസി നടപ്പിലാക്കിയിട്ടുണ്ട്, അതേസമയം മധ്യപ്രദേശ് യുസിസി കരട് തയ്യാറാക്കാൻ ഒരു സമിതി രൂപീകരിച്ചിട്ടുണ്ട്.

.   പ്രധാനമന്ത്രിയായും ഗുജറാത്ത് മുഖ്യമന്ത്രിയായും ഉള്ള മോദിയുടെ 25 വർഷത്തെ ഭരണകാലം പൂർത്തിയാകുന്നതിന്റെ ഭാഗമായി സെപ്റ്റംബർ 17 മുതൽ ഒക്ടോബർ 17 വരെ രാജ്യവ്യാപകമായി "സേവാ സങ്കൽപ് അഭിയാൻ" നടത്തുന്നതിന് മുഴുവൻ എൻഡിഎ സഖ്യവും സന്നദ്ധ സംഘടനകളും ഒന്നിച്ചുവരുന്നതായും അദ്ദേഹം പ്രഖ്യാപിച്ചു. "ഒരു സംസ്ഥാനത്തിന്റെ മുഖ്യമന്ത്രിയായും രാജ്യത്തിന്റെ പ്രധാനമന്ത്രിയായും സേവനമനുഷ്ഠിച്ച് 25 വർഷത്തെ തുടർച്ചയായ പൊതുസേവനം പൂർത്തിയാക്കിയെന്ന നേട്ടം ഈ രാജ്യത്ത് വളരെ കുറച്ച് നേതാക്കൾക്ക് മാത്രമേ കൈവരിക്കാൻകഴിഞ്ഞിട്ടുള്ളൂ. എല്ലാ സംസ്ഥാനങ്ങളും കേന്ദ്രഭരണ പ്രദേശങ്ങളും ഉൾപ്പെടെയുള്ള എല്ലാ ഭരണപരമായ യൂണിറ്റുകളിലും ഈ കാമ്പെയ്ൻ നടപ്പിലാക്കും," അദ്ദേഹം പറഞ്ഞു.