ഡൽഹിയിലെ മഹാറാലിയിൽ മുസ്ലിം ലീഗിനെ അവഗണിച്ചതായി പരാതി

​ന്യൂഡൽഹി:  ഡൽഹിയിൽ നടന്ന പ്രതിഷേധ മഹാറാലിയിലും തുടർന്നുണ്ടായ പ്രതിപക്ഷ നീക്കങ്ങളിലും മുസ്ലിം ലീഗിന് അർഹമായ പരിഗണന ലഭിച്ചില്ലെന്ന ആരോപണത്തിൽ പ്രതിഷേധം ശക്തമാകുന്നു. വിഷയത്തിന്റെ ഗൗരവം കണക്കിലെടുത്ത് പരാതി ഔദ്യോഗികമായി കോൺഗ്രസ് ഹൈക്കമാൻഡിനെ അറിയിക്കാൻ ലീഗ് നേതൃത്വം തീരുമാനിച്ചു.

.     ഇന്നലെനടന്ന മഹാറാലിയിൽ മുസ്ലിം ലീഗ് ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടി പങ്കെടുത്തുവെങ്കിലും അദ്ദേഹത്തിന് സംസാരിക്കാൻ വേദിയിൽ അവസരം നൽകിയിരുന്നില്ല. രാഷ്ട്രപതിയെ സന്ദർശിച്ച പ്രതിപക്ഷ പ്രതിനിധി സംഘത്തിലും വിദ്യാർത്ഥി-യുവജന കോർഡിനേഷൻ കമ്മിറ്റിയിലും മുസ്ലിം ലീഗിനെയോ പോഷക സംഘടനകളായ യൂത്ത് ലീഗ്, എം.എസ്.എഫ്. എന്നിവരെയോ ഉൾപ്പെടുത്താത്തതിലും അമർഷമുണ്ട്.

.     ലീഗിനെതിരായ ഈ അവഗണനകൾക്ക് പിന്നിൽ എ.ഐ.സി.സി. ജനറൽ സെക്രട്ടറി കെ.സി. വേണുഗോപാൽ ആണെന്ന് ലീഗിലെ ഒരു വിഭാഗം ആരോപിക്കുന്നു. മുൻപ് നിയമസഭാ തിരഞ്ഞെടുപ്പ് കാലത്ത് വി.ഡി. സതീശനെ മുഖ്യമന്ത്രി സ്ഥാനാർത്ഥിയായി ലീഗ് ഉയർത്തിക്കാട്ടിയതിലുള്ള അതൃപ്തിയാവാം ഇതിന് പിന്നിലെന്നും സംശയിക്കപ്പെടുന്നു.

.   മുന്നണിക്കുള്ളിലെ അതൃപ്തിയും ആവലാതികളും പരിഹരിക്കുന്നതിനായി വിഷയം ഉടൻ തന്നെ കോൺഗ്രസ് ഹൈക്കമാൻഡിന് മുന്നിലെത്തിച്ച് ഔദ്യോഗികമായി പ്രതിഷേധമറിയിക്കാനാണ് ലീഗിന്റെ നീക്കം.