ഒമാൻ തീരത്ത് ചരക്ക് കപ്പലിനു നേരെ ആക്രമണം ഇന്ത്യൻ നാവികൻ മരിച്ചു

മസ്കത്ത്: ഒമാൻ തീരത്ത് ചരക്കുകപ്പലിന് നേരെയുണ്ടായ ആക്രമണത്തിൽ ഇന്ത്യൻ നാവികന് ദാരുണാന്ത്യം. ഇന്ത്യയിലേക്ക് പുറപ്പെട്ട എം.വി. കേപ് ദാവോ എന്ന കപ്പലാണ് ആക്രമിക്കപ്പെട്ടതെന്ന് ഫോർവേഡ് സീമെൻസ് യൂണിയൻ ഓഫ് ഇന്ത്യ (എഫ്എസ്‌യുഐ) അറിയിച്ചു. ഉത്തർപ്രദേശിലെ ദിയോറിയ സ്വദേശിയായ സുരാജ് യാദവ് ആണ് മരിച്ചത്.

.     കപ്പലിൽ 20 ഇന്ത്യക്കാരുൾപ്പെടെ ആകെ 28 ജീവനക്കാരാണ് ഉണ്ടായിരുന്നത്. കപ്പലിന് നേരെ ടോർപിഡോ ആക്രമണമാണ് ഉണ്ടായതെന്നാണ് യൂണിയൻ പറയുന്നത്. രണ്ട് ടോർപിഡോകളിൽ ഒന്ന് കപ്പലിന്റെ സി ഡെക്കിലും മറ്റൊന്ന് എൻജിൻ റൂമിന് സമീപവുമാണ് പതിച്ചതെന്നാണ് എഫ്എസ്‌യുഐയുടെ വിശദീകരണം.

.     ആക്രമണത്തിൽ കപ്പലിന് ഗുരുതരമായ നാശനഷ്ടമുണ്ടായതായും ജീവനക്കാരുടെ സുരക്ഷ ആശങ്കയിലായതായും യൂണിയൻ വ്യക്തമാക്കി. ഹോർമുസ് മേഖലയിൽ സാധാരണ നാവികരുടെ ജീവൻ അപകടത്തിലാകുന്ന സാഹചര്യം തുടരുകയാണെന്നും എഫ്എസ്‌യുഐ ആരോപിച്ചു.

.     നാവികരുടെ സുരക്ഷ ഉറപ്പാക്കുന്നതിൽ ബന്ധപ്പെട്ടവർ അടിയന്തരമായി ഉത്തരവാദിത്വം ഏറ്റെടുക്കണമെന്നും ഇത്തരം ആക്രമണങ്ങൾ ആവർത്തിക്കാതിരിക്കാനുള്ള നടപടികൾ സ്വീകരിക്കണമെന്നും യൂണിയൻ ആവശ്യപ്പെട്ടു