13 വയസ്സുകാരിയെ പീഡിപ്പിച്ച പ്രതിക്ക് 4 വർഷം കഠിന തടവ്
2019 ലായിരുന്നു കേസിന് ആസ്പദമായ സംഭവം
NDR News
22 Dec 2021 10:25 PMകൊയിലാണ്ടി: പതിമൂന്നു വയസ്സുകാരിയെ ലൈംഗികമായി ഉപദ്രവിച്ച ചേളന്നൂർ സ്വദേശിക്ക് ശിക്ഷ വിധിച്ചു. കൊയിലാണ്ടി ഫാസ്റ്റ് ട്രാക്ക് സ്പെഷ്യൽ കോടതിയാണ് വിധി പ്രസ്താവിച്ചത്. നാല് വർഷം തടവും ഇരുപതിനായിരം രൂപ പിഴയുമാണ് ശിക്ഷ. ചേളന്നൂർ സ്വദേശിയായ ചീരങ്ങോട്ടിൽ അലിയെയാണ് (62) കേസിൽ കോടതി ശിക്ഷിച്ചത്.
ഫാസ്റ്റ് ട്രാക്ക് സ്പെഷ്യൽ കോടതി ജഡ്ജി ടി.പി. അനിലാണ് ശിക്ഷ പ്രസ്താവിച്ചത്. ഇരുപതിനായിരം രൂപ പിഴ അടയ്ക്കാനായില്ലെങ്കിൽ എട്ടുമാസം കൂടെ തടവ് ശിക്ഷ അനുഭവിക്കണം.
2019 ലായിരുന്നു കേസിന് ആസ്പദമായ സംഭവം. പുതിയങ്ങാടിയിൽ റോഡ് മുറിച്ചു കടക്കുകയായിരുന്ന പെൺകുട്ടിയെ പ്രതി ലൈംഗിമായി ഉപദ്രവിക്കുകയായിരുന്നു. എലത്തൂർ സബ് ഇൻസ്പെക്ടർ വിജേഷ് പി. അന്വേഷണം നടത്തിയ കേസിൽ സ്പെഷ്യൽ പബ്ലിക് പ്രോസിക്യൂട്ടർ പി. ജെതിനാണ് ഹാജരായത്.
