കോഴിക്കോട് മെഡിക്കല്‍ കോളേജില്‍ മുറ്റം ഇനി യന്ത്രം വൃത്തിയാക്കും
ജനുവരി ഒന്ന് മുതല്‍ പുതിയ മെഷീന്‍ ഉപയോഗിച്ച് ആശുപത്രിയുടെയും കോളേജിന്റെയും പുറത്തെ പരിസരം വൃത്തിയാക്കും
NDR News
30 Dec 2021 03:41 PMകോഴിക്കോട്: കോഴിക്കോട് മെഡിക്കല്‍ കോളേജില്‍ മുറ്റം തൂത്ത് വൃത്തിയാക്കുന്നതിനുള്ള യന്ത്രം ഇന്നാണ് എത്തിച്ചത്. മാലിന്യ മാറ്റത്തില്‍ വലിയ സഹായമായിരിക്കും ഈ യന്ത്രം. മെഡിക്കല്‍ കോളേജിലെയും ആശുപത്രിയിലെയും പുറം മാലിന്യങ്ങളും ചപ്പു ചവറുകളും തൂത്തു വൃത്തിയാക്കുക എന്നത് ഇത് വരെ ശ്രമകരമായ കാര്യമായിരുന്നു.
ഇതിനായി ആധുനിക സാങ്കേതിക വിദ്യകള്‍ ഉപയോഗിക്കാമോയെന്ന ചര്‍ച്ചയുടെ ഫലമായാണ് പുതിയ യന്ത്രമെത്തിച്ചത്. ജനുവരി ഒന്ന് മുതല്‍ പുതിയ മെഷീന്‍ ഉപയോഗിച്ചായിരിക്കും ആശുപത്രിയുടെയും കോളേജിന്റെയും പുറത്തെ പരിസരം വൃത്തിയാക്കുക. ആശുപത്രിയുടെയും കോളേജിന്റെയും ഉള്‍വശം വൃത്തിയാക്കാന്‍ അവശ്യംവേണ്ട യന്ത്രങ്ങള്‍ ഉണ്ടെങ്കിലും പുറത്തും പരിസര പ്രദേശങ്ങളും ശുചീകരണ തൊഴിലാളികളടക്കം വളരെ പാടുപെട്ടാണ് ശുചിയാക്കിയിരുന്നത്.
ഈ സാഹചര്യത്തിലാണ് കേരള മെഡിക്കല്‍ സര്‍വ്വീസ് കോര്‍പറേഷന്‍ ഇരുപത് ലക്ഷം രൂപ മുടക്കി പുതിയ യന്ത്രം കോഴിക്കോട്ട് എത്തിച്ചത്. ഇതോടെ മെഡിക്കല്‍ കോളേജിന് ചുറ്റുഭാഗങ്ങള്‍ ഏറ്റവും നല്ല നിലയില്‍ ശുചീകരിക്കാനാവുമെന്ന പ്രതീക്ഷയിലാണ് കോളേജ് അധികൃതര്‍.
