നെഹ്റു ട്രോഫി സ്വന്തമാക്കി വീയപുരം ചുണ്ടൻ
പള്ളാത്തുരുത്തി ബോട്ട് ക്ലബ്ബിന്റെ തുടര്‍ച്ചയായ നാലാം ജയമാണിത്
NDR News
12 Aug 2023 06:10 PMആലപ്പുഴ: നെഹ്റു ട്രോഫി വള്ളംകളിയിൽ ഒന്നാമതായി വീയപുരം ചുണ്ടന്‍.പുന്നമട കായലിന്റെ ഓളത്തിൽ ആവേശം നിറച്ച ഫൈനലില്‍ പള്ളാത്തുരുത്തി ബോട്ട് ക്ലബ് തുഴഞ്ഞ വീയപുരം ചുണ്ടന്‍, യുബിസി കൈനകരി തുഴഞ്ഞ ചമ്പക്കുളം ചുണ്ടന്‍, കേരള പൊലീസ് തുഴഞ്ഞ കാട്ടില്‍ തെക്കെതില്‍ എന്നീ വള്ളങ്ങളാണ് മാറ്റുരച്ചത്. പള്ളാത്തുരത്തിയുടെ തുടര്‍ച്ചയായ നാലാം വിജയമാണിത്.വിനോദ് പവിത്രനാണ് പരിശീലകന്‍.
അലന്‍ മൂന്നുതെക്കല്‍ പള്ളാത്തുരുത്തി ബോട്ട് ക്ലബിൻ്റെ ക്യാപ്റ്റനും മനോജ് പത്തുതെങ്ങുങ്കല്‍ ലീഡിങ് ക്യാപ്റ്റനുമാണ്. വി ജയപ്രസാദ് (പ്രസിഡന്റ്), എ സുനീര്‍ (സെക്രട്ടറി) എന്നിവരാണ് പള്ളാത്തുരുത്തി ബോട്ട് ക്ലബ്ബിന്റെ സാരഥികള്‍. പള്ളാത്തുരുത്തി ക്ലബ്ബിന്റെ(പിബിസി) നാല് വിജയങ്ങളും നാല് ചുണ്ടനിലായിരുന്നു. പായിപ്പാട്, നടുഭാഗം, മഹാദേവികാട് കാട്ടില്‍ തെക്കേത് ചുണ്ടനുകളിലാണ് കഴിഞ്ഞ മൂന്നു വിജയം ഇവർ സ്വന്തമാക്കിയത്.
