ചാലക്കുടി പുഴയിൽ യുവാവ് മുങ്ങി മരിച്ചു

തൃശൂർ: ചാലക്കുടി പുഴയിൽ കുളിക്കാനിറങ്ങിയ തമിഴ്നാട് സ്വദേശി മുങ്ങി മരിച്ചു. തെങ്കാശി സ്വദേശി മണികണ്ഠൻ (26) ആണ് മരിച്ചത്. ഇന്ന് വൈകീട്ട് നാല് മണിയോടെയായിരുന്നു സംഭവം. ചേനത്തുനാട് കടവിൽ കുളിക്കാൻ ഇറങ്ങിയ മണികണ്ഠൻ നീന്തുന്നതിനിടെ മുങ്ങിപ്പോവുകയായിരുന്നു.

     പുഴയുടെ മറുകരയിൽ ഉണ്ടായിരുന്ന മീൻപിടിത്തക്കാരാണ് മണികണ്ഠൻ മുങ്ങി താഴുന്നത് കണ്ടത്. ഉടൻ തന്നെ ഇവർ ചാലക്കുടി ഫയർഫോഴ്സിൽ വിവരം അറിയിക്കുകയും ഫയർഫോഴ്സും പൊലീസും സംയുക്തമായി നടത്തിയ തിരച്ചിലിൽ അഞ്ചരയോടെ മൃതദേഹം കണ്ടെത്തുകയുമായിരുന്നു.

    വർഷങ്ങളായി ചാലക്കുടിയിൽ താമസിച്ചുവരികയായിരുന്ന മണികണ്ഠൻ പ്രദേശത്തെ പലഹാരങ്ങൾ ഉണ്ടാക്കുന്ന സ്ഥാപനത്തിലെ ജീവനക്കാരനാണ്.