കുറ്റ്യാടി കോഴിക്കോട് റൂട്ടിലെ 25 ഓളം ബസുകളിൽ നിയമലംഘനം

പേരാമ്പ്ര: ബസ് ഡ്രൈവർമാരിൽ ചിലരുടെ അമിത വേഗവും ശ്രദ്ധയും കാരണം അപകടം പതിവായ കുറ്റ്യാടി -കോഴിക്കോട് റൂട്ടിൽ കർശന പരിശോധന നടത്താൻ അധികൃതർ. പേരാമ്പ്ര ജോയിൻ്റ് ആർടിഒ, പൊലീസ്, എക്സൈസ് എന്നിവയുടെ നേതൃത്വത്തിൽ ഇന്നലെ വൈകിട്ട് ബസ് സ്റ്റാൻഡിൽ പരിശോധന നടത്തി. ചില ബസുകൾ വിദ്യാർത്ഥികളെ കയറ്റാതെ പോകുന്നതായും ചില ഡ്രൈവർമാർ ലഹരി ഉപയോഗിച്ച് വാഹനം ഓടിക്കുന്നതായും പരാതി നിലനിൽക്കുന്ന സാഹചര്യത്തിലാണ് പരിശോധന.

      ഈ മേഖലയിൽ അമിത വേഗം കാരണം തുടർച്ചയായി അപകടങ്ങൾ ഉണ്ടാകുന്ന സാഹചര്യത്തിൽ നാട്ടുകാരുടെയും വിദ്യാർത്ഥി കളുടെയും പരാതി ഉയരുകയും മനുഷ്യാവകാശ കമ്മിഷൻ കേസെടുക്കുകയും ചെയ്തു. ഡ്രൈവർമാർ ലഹരി ഉപയോഗിച്ചിട്ടുണ്ടോ എന്നും വാഹനങ്ങളിൽ എയർ ഹോണുകൾ ഘടിപ്പിച്ചിട്ടുണ്ടോ എന്നും വാഹനങ്ങളുടെ ഫിറ്റ്നാസും പരിശോധിച്ചു. അൻപതോളം ബസുകളിൽ നടത്തിയ പരിശോധനയിൽ ഇരുപത്തഞ്ചോളം ബസുകളിൽ എയർ ഹോൺ, നിരോധിത ലൈറ്റുകൾ എന്നിവയും നികുതി അടയ്ക്കാത്തതുമായ വാഹനങ്ങൾ കണ്ടെത്തി.