കരിമ്പാപ്പൊയിലിൽ സ്വകാര്യ ബസുകൾ കൂട്ടിയിടിച്ച് യാത്രക്കാർക്ക് പരിക്ക്

നടുവണ്ണൂർ: കരിമ്പാപ്പൊയിലിൽ സ്വകാര്യ ബസുകൾ കൂട്ടിയിടിച്ച് അപകടം. കുറ്റ്യാടി കോഴിക്കോട് റൂട്ടിൽ സർവ്വീസ് നടത്തുന്ന ബി.ടി.സി ബസും കാർത്തിക ബസുമാണ് കൂട്ടിയിടിച്ചത്. അപകടത്തിൽ യാത്രക്കാർക്ക് പരിക്കേറ്റു. പരിക്ക് ഗുരുതരമല്ലെന്നാണ് പ്രാഥമിക വിവരം. കോഴിക്കോട് കുറ്റ്യാടി റൂട്ടിലെ സ്വകാര്യ ബസ്സുകളുടെ അമിതവേഗത എന്നും ചർച്ചാവിഷയമാണ്. അമിത വേഗതയിലെത്തുന്ന സ്വകാര്യ ബസുകളുകൾ നിരന്തരം അപകടങ്ങളുണ്ടാക്കുന്ന സ്ഥിതിയുണ്ട്. അടുത്തിടെ പേരാമ്പ്രയിൽ ബസ് ഇടിച്ച് സ്‌കൂട്ടർ യാത്രികനായ വിദ്യാർഥി മരണപ്പെടുകയും ചെയ്‌തിരുന്നു.

     ഈ സംഭവത്തിൽ പ്രതിഷേധിച്ച് നാട്ടുകാർ ബസുകൾ തടയുകയും ഒരാഴ്ചയോളം ബസ് സർവ്വീസുകളെ ഇത് ബാധിക്കുകയും ചെയ്തിരുന്നു. ഇതിനു പിന്നാലെ സ്വകാര്യ ബസുകളുടെ അമിത വേഗത നിയന്ത്രിക്കാൻ നടപടിയുണ്ടാകുമെന്ന അധികൃതരുടെ ഉറപ്പിനെ തുടർന്നാണ് സർവ്വീസ് പുനരാരംഭിച്ചത്. ഇതിനിടയിലാണ് ഇപ്പോൾ വീണ്ടും ഈ റൂട്ടിൽ അപകടം ഉണ്ടായിരിക്കുന്നത്