യാത്രക്കാരനെ ഇടിച്ചു നിർത്താതെ പോയ വാഹനത്തിൻ്റെ ഡ്രൈവർ അറസ്റ്റിൽ

കോഴിക്കോട്: വടകരയിൽ കാൽനട യാത്രക്കാരനെ ഇടിച്ചു നിർത്താതെ പോയ വാഹനത്തിൻ്റെ ഡ്രൈവർ അറസ്റ്റിൽ. കാർ ഓടിച്ചിരുന്ന കടമേരി സ്വദേശി അബ്ദുൽ ലത്തീഫാണ് പൊലീസ് പിടിയിലായത്. കോഴിക്കോട് വള്ളിക്കാട് വെച്ചായിരുന്നു കാൽനട യാത്രക്കാരൻ്റെ ജീവനെടുത്ത അപകടം നടന്നത്. പ്രതി വിദേശത്തേക്ക് കടക്കാനുള്ള സാധ്യത കണക്കിലെടുത്ത് നോട്ടീസ് പുറത്തിറക്കിയിരുന്നു. ഇയാളോട് വടകര പൊലീസിൽ ഹാജരാകാൻ നിർദ്ദേശിച്ചിരുന്നുവെങ്കിലും ഹാജരായിരുന്നില്ല. 

    കഴിഞ്ഞ വ്യാഴാഴ്‌ച രാത്രിയായിരുന്നു വള്ളിക്കാട് പൊലീസ് എയ്‌ഡ്‌ പോസ്റ്റിന് സമീപംവെച്ച് അമൽ കൃഷ്‌ണ എന്നയാളെ ഇന്നോവ കാർ ഇടിച്ചുവീഴ്ത്തിയത്. തലയ്ക്ക് ഗുരുതരമായി പരിക്കേറ്റ അമൽ കൃഷ്ണ‌ കോഴിക്കോട് മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ കഴിഞ്ഞദിവസം മരിച്ചു. ഏറാമലയിൽ നിന്നും പോലീസ് കാർ കസ്റ്റഡിയിൽ നിന്നും എടുത്തിരുന്നു. 500ലധികം സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് അമൽ കൃഷ്ണയെ ഇടിച്ച് നിർത്താതെപോയ ഇന്നോവ കാർ പൊലീസ് തിരിച്ചറിഞ്ഞത്.