ചക്കിട്ട പാറയിൽ മുള്ളൻപന്നി സ്കൂട്ടറിൽ ഇടിച്ച് യാത്രക്കാരന് ഗുരുതര പരിക്ക്

പേരാമ്പ്ര: നരിനട - ചക്കിട്ടപാറ റോഡിലെ കുഴികണ്ടം മുക്കിൽ മുള്ളൻപന്നി സ്കൂട്ടറിലിടിച്ച് മധ്യ വയസ്കന് ഗുരുതര പരിക്ക്. നരിനട സ്വദേശി തയ്യുള്ളതിൽ ജീജോ (55)യാണു് അപകടത്തിൽ പെട്ടത്. ബുധനാഴ്ച പുലർച്ചെയാണ് സംഭവം. ഗൾഫിൽ നിന്നു വരുന്ന ആളെ കൂട്ടാൻ ചക്കിട്ടപാറയിലുള്ള ഒരു വീട്ടിൽ നിന്നു കാർ എടുക്കാനായി വരുന്നതിനിടയിലായിരുന്നു അപകടം. 

     സമയം കഴിഞ്ഞും എത്താത്തതിനാൽ ജീജോയെ ഈ വീട്ടുകാർ വിളിച്ചപ്പോഴാണ് അപകട വിവരം അറിഞ്ഞത്. ഇവർ ഇവിടെ എത്തിയപ്പോൾ ദേഹമാസകലം പരിക്കേറ്റ് രക്തത്തിൽ കുളിച്ചു പാതയോരത്ത് ഇയാൾ കിടക്കുന്നതാണ് കണ്ടത്. ആദ്യം ചക്കിട്ടപാറ ആശുപത്രിയിലും തുടർന്ന് പേരാമ്പ്ര ഇഎംഎസ് സഹകരണ ആശുപത്രിയിലും എത്തിച്ച് ചികിത്സ നൽകി. പിന്നീട് കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.