കോടഞ്ചേരിയിൽ ഓടിക്കൊണ്ടിരുന്ന കാറിന് തീപിടിച്ചു

താമരശ്ശേരി: കോടഞ്ചേരി അങ്ങാടിയിൽ ഓടിക്കൊണ്ടിരുന്ന കാറിന് പെട്ടെന്ന് തീപിടിച്ചു. കാറിന്റെ മുൻഭാഗത്തുനിന്ന് പുക ഉയരുന്നത് കണ്ട് ഡ്രൈവർ വാഹനം പെട്ടെന്ന് നിർത്തി യാത്രക്കാർ പുറത്തിറങ്ങിയതിനാൽ വൻ ദുരന്തം ഒഴിവായി. കാറിലുണ്ടായിരുന്ന മലപ്പുറം വേങ്ങര സ്വദേശികളായ രണ്ടുപേരാണ് അത്ഭുതകരമായി രക്ഷപ്പെട്ടത്.

       കോടഞ്ചേരി അങ്ങാടിയിലെ എൽ.പി. സ്കൂളിന് താഴെവച്ചായിരുന്നു അപകടം. വേങ്ങരയിൽ നിന്നും മർക്കസ് നോളജ് സിറ്റിയിലേക്ക് പോവുകയായിരുന്ന റിനോൾട്ട് ക്വിഡ് കാറിനാണ് തീ പിടിച്ചത്.

      യാത്രക്കാരുടെ സമയോചിതമായ ഇടപെടലും നാട്ടുകാരുടെ രക്ഷാപ്രവർത്തനവുമാണ് വലിയൊരു അപകടം ഒഴിവാക്കിയത്. കാറിന് തീപിടിക്കുന്നത് കണ്ട് സമീപത്തെ വ്യാപാരികളും നാട്ടുകാരും ഉടൻ തന്നെ വെള്ളം കോരിയൊഴിച്ച് തീ അണയ്ക്കാൻ ശ്രമിച്ചു. തുടർന്ന് സമീപത്തെ എൽ.പി. സ്കൂൾ, ഫെഡറൽ ബാങ്ക് എന്നിവിടങ്ങളിൽ നിന്നും എത്തിച്ച രണ്ട് ഫയർ എക്സ്റ്റിംഗുഷറുകൾ ഉപയോഗിച്ചാണ് തീ പൂർണ്ണമായും നിയന്ത്രണവിധേയമാക്കിയത്.

     ഷോർട്ട് സർക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം. അപകടത്തെത്തുടർന്ന് കോടഞ്ചേരി ടൗണിൽ അല്പം സമയം ഗതാഗത തടസ്സമുണ്ടായി.