ഷൊർണൂർ റെയിൽവേ സ്റ്റേഷൻ ഇരട്ടപ്പാത നിർമ്മാണത്തിനുള്ള സ്ഥലം ഏറ്റെടുപ്പു തുടങ്ങി

പാലക്കാട്: ഷൊർണൂർ റെയിൽവേ ജങ്ഷനിലേക്ക് പ്രവേശിക്കുന്നതിന് മുൻപ് തീവണ്ടികൾ പിടിച്ചിടുന്ന പ്രയാസകരമായ സ്ഥിതിക്ക് പരിഹാരമായി റെയിൽവേ ഇരട്ടപ്പാത നിർമ്മാണത്തിനായുള്ള സ്ഥലമേറ്റെടുപ്പ് നടപടികൾ പുരോഗമിക്കുന്നു. 

.       ഇതിന്റെ ഭാഗമായി 3.40 ഏക്കർ സ്ഥലം ഏറ്റെടുക്കുന്നതിനുള്ള സർവേ നടപടികൾ പൂർത്തിയായിട്ടുണ്ട്. ഷൊർണൂർ നഗരസഭ ഉൾപ്പെടെയുള്ള പ്രദേശങ്ങളിലെ 43 വ്യക്തികളിൽ നിന്നായി 49 സർവേ നമ്പറുകളിലുൾപ്പെടുന്ന ഭൂമിയാണ് ഇതിനായി ഏറ്റെടുക്കുന്നത്. 

.       ഇതിനുള്ള ഔദ്യോഗിക വിജ്ഞാപനം ഇതിനോടകം പുറത്തിറങ്ങിയിട്ടുണ്ട്. ഭാരതപ്പുഴയ്ക്ക് കുറുകെ പുതിയ പാലത്തിന്റെ നിർമ്മാണവും ഷൊർണൂർ യാർഡ് റീമോഡലിങ്ങും ഈ പദ്ധതിയുടെ ഭാഗമായി നടക്കുന്നുണ്ട്. ഷൊർണൂർ-ഒന്ന് വില്ലേജിൽ ഉൾപ്പെടുന്ന പാലത്തിന്റെ പരിസര പ്രദേശം മുതൽ ഷൊർണൂർ സ്റ്റേഷൻ വരെയുള്ള ഭാഗത്തുള്ള ഭൂമിയാണ് പദ്ധതിക്കായി ഏറ്റെടുക്കുന്നത്. ഈ ഇരട്ടപ്പാത യാഥാർത്ഥ്യമാകുന്നതോടെ ഷൊർണൂർ മേഖലയിലെ ട്രെയിൻ ഗതാഗത തടസ്സങ്ങൾക്കും സമയനഷ്ടത്തിനും വലിയൊരു പരിഹാരമാകുമെന്നും തീവണ്ടികളുടെ വേഗത വർദ്ധിപ്പിക്കാൻ കഴിയുമെന്നുമാണ് പ്രതീക്ഷിക്കുന്നത്.