പഴയത്ത് മന സതീശൻ നമ്പൂതിരി ഗുരുവായൂർ മേൽശാന്തി

ഗുരുവായൂർ: ഗുരുവായൂർ ക്ഷേത്രം മേൽശാന്തിയായി ഓതിയ്ക്കൻ കുടുംബാംഗം ഗുരുവായൂർ ചാമുണ്ഡേശ്വരി പഴയത്ത് മന സതീശൻ നമ്പൂതിരി തിരഞ്ഞെടുക്കപ്പെട്ടു. ഒക്ടോബർ ഒന്നുമുതൽ മാർച്ച് 31 വരെയാണ് കാലാവധി. രണ്ടാംതവണയാണ് ഇദ്ദേഹം മേൽശാന്തിയാകുന്നത്.

.    പഴയത്ത് ഇട്ടിരവി നമ്പൂതിരിയുടേയും ഗുരുവായൂർ പൊട്ടക്കുഴി ഇല്ലത്ത് ശാന്ത അന്തർജനത്തിന്റെ മകനാണ് 58-കാരനായ സതീശൻ നമ്പൂതിരി. 42 വർഷമായി ഗുരുവായൂർ ക്ഷേത്രത്തിൽ പൂജ നിർവഹിച്ചുവരുന്നുണ്ട്. ഗണിതശാസ്ത്ര ബിരുദധാരിയാണ്. ഭാര്യ: ഒറ്റപ്പാലം മേച്ചേരി മന ഷീജ അന്തർജനം.

.    ബെംഗളൂരുവിൽ ആയുർവേദ ഡോക്ടറായ ശ്രീരഞ്ജിനിയും ചെന്നൈയിൽ സോഫ്റ്റ് വെയർ എൻജിനീയർ ശ്രീവിദ്യയുമാണ് മക്കൾ. മരുമകൻ: വിഷ്ണു (സോഫ്റ്റ് വെയർ എൻജിനീയർ, ബെംഗളൂരു).

.    വ്യാഴാഴ്ച ഉച്ചപ്പൂജ കഴിഞ്ഞ് ക്ഷേത്രം നമസ്കാരമണ്ഡപത്തിൽ 43 പേരിൽനിന്ന് നറുക്കെടുപ്പിലൂടെയാണ് സതീശൻ നമ്പൂതിരി തിരഞ്ഞെടുക്കപ്പെട്ടത്. 

.    തന്ത്രിമാരായ ചേന്നാസ് ദിനേശൻ നമ്പൂതിരിപ്പാട്, ചേന്നാസ് കൃഷ്ണൻ നമ്പൂതിരിപ്പാട് എന്നിവരുടെ സാന്നിധ്യത്തിൽ നിലവിലെ മേൽശാന്തി പി.എം. നാരായണൻ നമ്പൂതിരി നറുക്കെടുത്തു. ദേവസ്വം ചെയർമാൻ എ.വി. ഗോപിനാഥ്, ക്ഷേത്രം ഊരാളൻ മല്ലിശ്ശേരി പരമേശ്വരൻ നമ്പൂതിരിപ്പാട്, അഡ്മിനിസ്ട്രേറ്റർ എസ്. ഹരിഗോപാൽ തുടങ്ങിയവർ സംബന്ധിച്ചു.