കൊച്ചി സിറ്റി പോലീസ് കമ്മീഷണറെ മാറ്റി; ആർ. നിശാന്തിനി പുതിയ കമ്മീഷണർ

​കൊച്ചി: ചേരാനല്ലൂരിൽ തട്ടുകട ഉടമ കാറിടിച്ച് മരിച്ച സംഭവത്തിൽ പോലീസിന്റെ അന്വേഷണത്തിലുണ്ടായ ഗുരുതരമായ വീഴ്ചകളെത്തുടർന്ന് ഉന്നത പോലീസ് നേതൃത്വത്തിൽ വൻ അഴിച്ചുപണി. കൊച്ചി സിറ്റി പോലീസ് കമ്മീഷണറായിരുന്ന കാളിരാജ് മഹേഷ് കുമാറിനെ പദവിയിൽ നിന്ന് മാറ്റി. പകരം ആർ. നിശാന്തിനിയെ കൊച്ചി സിറ്റി പോലീസ് കമ്മീഷണറായി സംസ്ഥാന സർക്കാർ നിയമിച്ചു.  

​.      അപകടം നടന്ന സമയം മുതൽ ചേരാനല്ലൂർ സ്റ്റേഷനിൽ നിന്നുള്ള വിവരങ്ങൾ മേലുദ്യോഗസ്ഥർക്ക് കൈമാറിയിരുന്നെങ്കിലും, അന്വേഷണത്തിന്റെ മേൽനോട്ടത്തിൽ ഗുരുതരമായ വീഴ്ച്ച സംഭവിച്ചതായി കണ്ടെത്തി. ഇതാണ് കമ്മീഷണറെ സ്ഥാനത്തുനിന്നും മാറ്റാൻ സർക്കാരിനെ പ്രേരിപ്പിച്ചത്.

​.     ഉദ്യോഗസ്ഥർക്ക് സസ്പെൻഷൻ: കേസിൽ കൃത്യമായ അന്വേഷണം നടത്താത്തതിനും കൃത്യമായ വകുപ്പുകൾ ചുമത്തുന്നതിൽ വീഴ്ച വരുത്തിയതിനും ചേരാനല്ലൂർ സ്റ്റേഷനിലെ നാല് പോലീസ് ഉദ്യോഗസ്ഥരെ കഴിഞ്ഞ ദിവസം തന്നെ സസ്പെൻഡ് ചെയ്തിരുന്നു.

​.      പോലീസും സർക്കാരും നിലവിൽ സ്വീകരിച്ച നടപടികളിൽ തൃപ്തിയുണ്ടെങ്കിലും, നിയമത്തിലെ പരിമിതികൾ കാരണം പ്രതിക്ക് അർഹമായ ശിക്ഷ ലഭിക്കുമോ എന്ന ആശങ്ക അപകടത്തിൽ മരിച്ച ജയ ബാലകൃഷ്ണന്റെ മകൾ ഭദ്രകീർത്തി പങ്കുവെച്ചു.

​      സിറ്റി കമ്മീഷണർക്ക് പുറമെ അന്വേഷണ വീഴ്ച വരുത്തിയ സെൻട്രൽ എ.സി.പി, ഡി.സി.പി തലങ്ങളിലുള്ള ഉദ്യോഗസ്ഥർക്കെതിരെയും അന്വേഷണം വേണമെന്നും നടപടിയെടുക്കണമെന്നുമാണ് ഇപ്പോൾ ഉയരുന്ന പ്രധാന ആവശ്യം